Теннисрал турнир

Вай гьантрай Гъумучиял спортзалдануву хьунни Авгъанная Совет аьрал буккан баврин ва Ватан дуруччултрал кьинилун хас дурсса аьдатравун дагьсса теннисрай буккаврил турнир.


Ялун нанисса байрангу барча дурну, турнирданий гьуртту хъанахъиминнан тIайлабацIу чIа увкуна райондалул администрациялул Жагьилтурал, спортрал ва туризмалул отделданул каялувчи Малик ХIусмановлул ва чIаважагьилтурал спортшколалул директор Шарабуттин Хановлул.

Турнирданий гьуртту хьунни Гъумучиял, Щардал, КIундиннал, ГьунчIукьатIрал, ЧIурттащиял, Хъунайннал ва Хьурттал школар­ттал дуклаки оьрчIру – цинявппагу 30 инсан.
Бяст-ччал бия 5-7-ми ва 8-11-ми классирттал дянив. 5-7-ми классир­ттал дянивсса бяст-ччаллий цалчинмур кIану бувгьунни Ханов Иманаьлил, кIилчинмур кIану – ХIусманов Мурадлул (Гъумучиял школа), шамилчинмур кIану – Хьурттал школалул дуклаки оьрчI Муртазялиев Кьурбаннул. Тамашачитурал чулухасса бахшишран лайкь хьунни Гъумучиял школалул дуклаки оьрчI Ханов ХIасанбасри.

8-11-ми классирттал дуклаки оьрчIал дянив шанмагу кIану бувгьунни ЧIурттащиял школалул дуклаки оьрчIал: Исяев МахIаммадлул, Ибрагьимов Салманнул, МахIаммадов Ханнул.
Жагьилтурал ва оьрмулул хъуниминнал бяст-ччаллай гьур­тту хьунни 25 инсан. Цалчинмур кIану бувгьунни Ибрагьимов АьвдурахIимлул (ЧIурттащи), кIилчинмур кIану – ХIусманов Маликлул, шамилчинмур кIану – Жабраилов Маликлул (Гъумучи).

Чутну буклакисса бяст-чча­ллий гьуртту хьунни 8 чут. Жабраилов Маликлул ва АлхIа­санаев Бухаринал бувгьунни цалчинмур кIану, Ибрагьимов АьвдурахIимлул ва Ибрагьимов Аьлимирзал бувгьунни кIилчинмур кIану, ХIусманов Маликлул ва Ханов Шарабу­ттиннул бувгьунни шамилчинмур кIану.
ХьхьичIунсса кIанттурду бувгьуминнан буллунни сакиншинначитурал чулухасса дипломру ва бахшишру.

ХIадур бувссар
Зулайхат Тахакьаевал