Оькьинирду дакIнийн дичлай

«ДакIний бити шагьру Ленинград» тIисса цIанилусса батIаву хьунни январьданул 26-нний Каспийскаллал шагьрулул хъунмур библиотекалий, Ленинград шагьрулул блокада къуртал хьусса кьинилун хасну.


Бадрижамал Аьлиева
Мунивух гьуртту хьунни аьрали элмурдал доктор, профессор Герман Кириленко, Каспийск шагьрулул аьрали комиссар Марат Пашаев, Ф. Аьлиевал цIанийсса ЦБС-лул директор Мадина Темирова ва чIявусса цаймигу инсантал.
БатIаву дачин дурсса ЦБС-рал 1-мур филиалданул хъунмур Саида Хурияловал дакIнийн бувтунни январьданул 27-чинсса кьини Аьрасатнаву баян бувну душиву Аьрали славалул кьинину, му кьини 1944 шинал къуртал хьушиву Ленинград шагьрулул блокада.
— Ленинградрахлусса талатаву хъанахъиссар дунияллул кIилчинмур дяъвилул тарихравусса ца агьаммур ишну, — увкунни ванил.
Ихтилатру бунни Герман Кириленкол, Марат Пашаевлул ва мукунма цайминналгу.
БавтIминнал ххал дунни «Блокада» цIанилусса документал фильм.
МинутIрайсса пахъ багьаву дунни Буттал кIанттул цIанийсса Хъунмасса дяъвилий жанну дуллуминнал аьпалун.