Жуйвасса буржри му

ХIакьинусса жула хъиривсса никирал дянив хъанахъисса цаппара ишру я няраща, я кIулшилуща лаласун къахъанахъиссагу бур. МахIачкъалаллал 40-мур школалий хьусса ца иширалгу мукунмасса асар биян буллай бур.

Залму АьбдурахIманова
Ва ишгу ялун бю­хъай­ва къаличин, агарда цан­ма-цивппа виртталну чIа­лачIисса духIин дакъултравасса цаннал, телефондалийнгу ларсун, видео социал сетрайн къадуртссания. Видеолий бур бявкъусса, тай марххалтту бувсса гьантрай, марххалттанул гуржив ришлай, щяту бизан къабитлатисса душ ва тяхъасса тиху-шихунмай лечлачисса кIия-шама оьрчI. Ца ур марххал­ттанул гуржи, хъягу-хъяй, хъинну цаятувагу рязину, бу-бакъацири оьккимахъругу тIий, душнил къинттуллуйх ришлай. ОьрчIал ихтилатраву ишла буллали­сса оьккисса мукъурттилва махIаттал бувну бия социал сетирдаву пикри-зикрирду кIибачIлачIисса хъуни аранталгума.
Агьалинаву хъунма­сса аваза гьаз шаврицIун, хъиривмур кьинива МахIач­къалаллал КIулшиву дулаврил управлениялул хъунама ТIагьир Мансуровлул, школалийн оьрчIал нину-ппугу бучIан бувну, гайннахь душнихь ва ганил нитти-буттахь багъишла бити учин бувунни. Ба­гъишла къабивтун ци банссар? Гихунмай утти нитти-буттал иш бур цала оьрчIал тарбиялул ялув цивппа бацIан. Жула оьрчIру жухвар бурувгун оьрмулуву къуццу буллалисса.
Социал сетирдаву чан­сса бакъар «хIукуматрал давуртту дакъа тIий, базаллаву, ттучаннай зузисса нитти-бутталгу чIун дакъар оьрчIал ялув бацIансса, миннал хъирив буккансса» тIиссагу. Хъинну захIматри рязи хьун укун тIиминнащалгу. Жува оьрчIру жунмар бувайсса. Ми жува я хIукуматран, я къуллугъчитуран, я щин-бунугу аьркинну къабувайхьунссархха. Бувсса куццуй тарбиягу буван жуйвасса, нитти-буттахъайсса, буржри.