[dropcap]Я[/dropcap]нварьданул 25-нний Аьрасатнал вузирдаву кIицI лагайссар Студентнал кьини. Ва кьини студентътурал дянив дувайссар факультетирттал вивсса аьдатругу, миннуцIун дархIусса тяхъашивурттугу.Дагъусттаннал вузирдал сахIнардайгу студентътурал дянив вай гьантрай шайссар КВН-ну, хIазсса мажлисру.
Залму АьбдурахIманова
ХIакьинусса студентнал оьрмугу лахьхьусса жуламуния хъуннасса личIишиву дакъасса бур. Бюхъай так телефонну, интернет ва социал сетьру ххи хьуну дикIан.
Дагъусттаннал педагогикалул университетрал дагъусттаннал мазурдил факультетрай 2-мур курсирай дуклакисса Аьзиева Луизащал на кIул хьуссияв ларгсса шинал ца мероприятиялий. Бувну бур Луиза Хабаровскаллал крайрайсса Комсомольск-на Амуре тIисса шагьрулий Ккуллал шяраватусса Исмяйл ва Багуннул кулпатраву. Тихун вайннал кулпат багьну бур къатлул залуннал пиша сававну – Исмяй ур аьраличу, нину Багун тIурча, усттарну цила пиша кIулсса ччатIшахьу-кондитер.
— Луизай, Дагъусттаннаяту архсса, дунияллул зуманивсса школалий цалагу ниттил мазрал дарсирай щякъабивкIсса вин му цIана инава дуклакисса факультетрайн буххайни ниттил маз ишлану къабивкIшиврия нигьзагу дияв?
— Мяйжаннугу, шихун дуклан бувкIни, хьхьичIва-хьхьичI ттухьхьун гьарнал булаймур суал му бикIайнуккива. Дагъусттанная архну ялапар хъанай бивкIнугу, ттул нитти-буттал на гьар шинах, ттун кIира шин хьуния тинмай, гъинттул чIумал буттал шяравун биянмур байва. Цащава къахъанахъийнигу, нава тIайла буккайвав шяравун. Ттул уссил тIурча, Ккулув школагу къуртал бувну, Амурскаллал паччахIлугърал университет къуртал бувссар. Мунийн бувну, литературалул маз къакIулхьурчагу, шиккун бухханнинма уссурссунначIан букIлай, кIулссия ихтилат бан. Экзаменнугу Хабаровскаллал крайрай дуллуну, бувхссияв ттула ниттирссу, зун чIявучин кIулсса балайчи, Жанна Кьурбановал маслихIатрайну шиккун. ХIайпгу тIий бакъара ва факультетрай дуклакаврий. Хъинну цаннащал ца бавкьусса, студентътурал ва преподавательтурал дянив нахIу-хIаласса арарду дусса факультет бур жул. Дуккавугу къуртал дурну, Дагъусттанная цамур региондалийн гьан кьисмат хьурчагума, пикригу бур жула ватанлувтал батIайсса центрдай лакку оьрчIахь ниттил мазрал дарсру дихьлансса.
— Цукун бивзри вин дахьва дуклан бувхни шиккусса жагьилтурал, студентътурал оьрму?
— Дуклан буххайхтува, на кьамул бувунав вузрал активистътурал кьюкьлувун. Гьарца университетрал волонтерталгу гьурттусса мероприятиярттай чялишсса гьурттушинна дуллай байбивхьуссияв. На школа къуртал бувсса шагьрулул жагьилтурал ва жула шиккусса жагьилтурал дяниву хъуннасса тапаватшиву дур. Шикку бур хъунанал, хъамитайпалул, чIахху-чIарахнал хIурмат бусса, цаннал ца бувгьусса жагьи-жугьулт. ДакIру тIиртIусса, кумаг бан хIадурсса. Ца-ца барча бакъу сававну, циняв жагьилтал оькки буллан къабучIиссар.
— ХIакьинусса студент – му цур?
-ХIакьинусса студент – мугу, кьура-зувира шинал хьхьичI кунасса, мува му студентри, так чIумуха лавхьхьуну къуццу буллалисса. «Стипендиялия стипендиялийннин» тIийкун, студентътурал къайгъурду гайва гай бикIайнуккар. Дарс лахьхьайсса, ца цайнма бакъа умуд къабивхьусса, цала хIарачатрайну оьрмулул ва захIматрал ххуллийн уккан хIарачат буллалима студентная шайхьунссар ххуйсса пишакаргу. Му гьарцаннал цаятурасса тIалавшиннардал иш бухьунссар.
-Барчаллагь, Луизай! ТIайлабацIу баннав вин дуккавриву ва оьрмулуву.
