Ина вилла цIа чирчуссар ххуйсса ххуттай

ЦIусса 2018 шин дайдихьлахьисса январь зурул цалчинми гьантрай кIицI ларгунни, лакрал жяматран акъагу, Дагъусттаннал агьалинангу ххуйну кIулсса, Аьвдуразакьлул арс Абакаров Рапи ниттил увну 70 шин шаврил юбилей.

Ванал яргсса ва авадансса биографиялий на къаацIанна, ттунма кIулмуния бусанна ца­ппара затру. 1980 шинал декабрьданул 5-нний Ккуллал райком партиялул конференциялий Рапи Абакаров увчIуна Ккуллал КПСС-рал райкомрал I-ма секретарьну.
Ккуллал район дия цIанихсса ризкьичитурал район. Райондалул бакI дургьуминналгу хъунмур къулагъас дикIайва ризкьи чIяву бансса, миннуя дучIаймур гьарза дансса, хIукуматран накI, дикI, ппал даххаврил планну щаллу дансса. Амма ургъил чанну бикIайва райондалул захIматкашнан лайкьсса шартIру дузал даврил чулухунмай. Масалдаран, цайми чIаххуврайсса районнах бурувгун, бакъая райондалий гила-шила увкIсса республикалул вакилнащал хьунабавкьуну, мажлис батIин бюхъайсса клуб ягу дворец.
Райондалул больница бия 30-ку шиннардийва бувсса къума-цIансса къатраву, шяраваллавунсса ххуллурду бия хъинну бучIан-гьан захIматсса, дакъая щархъаву хIачIайсса щинал дузалшинна, телевизорду тIисса зад нажагьнан бакъа къакIула, телефондалул оьвчаврил иш бия лап лащинсса тагьарданий ва м.ц. Вай ишру чIалай, Рапинал цала даврил пикри-зикри най бунува бурган бувна ялув кIицI бувсса масъаларттах. Байбивхьуна буллай цIусса Культуралул дворец, дайдирхьуна дуллай типовойсса больницалул къатри. Вихьуллал шяраваллил хьхьичIсса зунттуй дацIан дурна телевизорду ххал буллансса вышка, байбивхьуна шяраваллавунсса ххуллурду гьарта буллай ва ламурду буллай, шяраваллаву школалул, культуралул, спорт­рал, фельдшерский пунктирдал къатри дуллан бивкIуна, щинну дуцлан бивкIуна. Бувну бацIан був­ссар зунттал районнай ца яла хъунмур Культуралул дворец – 750 инсаннансса кIану бусса. Ваччав, Ккулув, Хъусрахь, Вихьлив зун диркIссар цIусса АТС. Ваччав, Къянив бувссар цIусса школартту. Къянив бувссар 2 ламу. Цалчинмур ЦIувкIрав нанисса ххуллурдугу гьарта бувну, бувссар 2 ламу, ЦIийшиял шяравунсса ххуллий бувссар цIусса ламу. Хъюйннал шяравунсса ххуллу бувссар, гьартагу бувну, цIунилва-цIунил цамур кьасса кIанттурдайхчил. СумбатIлив ва Ваччав дурцуссар архсса кIанаватусса хIачIай щин.
Щин дурцуссар Вихьлив, Къянив, Ссухъив. Хъусращиял шяравун Орджоникидзелия бучIан бувссар спортивный комплекс бувансса ярагъ. Райцентрданий дацIан дурссар цIусса райком партиялул къатри, актовый залгу бусса, райкомрал зузалт яхъа­нансса мукьва квартиралун­сса къатри, кIирайра дурссар Ваччав, зузи бувссар гьантлун 10 тонна шахьан бюхъайсса пекарня. Ккуллал шяраву дацIан дурссар кIира зивулийсса машлул центрданул къатри.
ЧIирисса чIумул мутталий (ванал дурагу ххюра шинъя дурсса райондалий каялувшиву дуллай) Рапинал хIарачатрайну дурссар хъинну чIярусса давур­ттив. Ванищала архIал, нукIува тIисса куццуй, шяраваллил хозяйство хьхьичIуннай шаврил масъаларттугу хъиннува ххуйну щаллу буллай бивкIссар.
Вай шиннардий циняв колхозирттал къутаннайсса яттил даэрдайн бувцуссар электричествалул ток, сакин дурссар ризкьичитурансса шартIру. Лахъсса ккаккияртту хьун даврихлу район лайкь хьуссар цал ХIурматрал грамоталун, яла Занази ЯтIул ттугълин – ЦК КПСС-рал, СССР-нул Министртурал Советрал, ВЦСПС-рал ва ВЛКСМ-рал ЦК-лул чулухатусса. Вайва ттугъру ва ХIурматрал грамотар­тту ларсъссар личIи-личIисса шиннардий Хъусращиял Казбековлул цIанийсса, Ккуллал Гьарун Саэдовлул цIанийсса, Вихьуллал «Путь коммунизма» тIисса, Хъювхъиял Орджоникидзел цIанийсса, 2-мур ЦIувкIуллал СССР-данул Вирттаврал цIанийсса колхозирттал.
Рапинащал архIал, хъачI хъачIрай дирхьуну, укунсса ккаккияртту хьун дуллай, зий, захIмат буллай бивкIссар колхозирттал бакIчитал: АхIмадов Тахакьа, Рамазанов ХIасан, НурмахIаммадов Рамазан, Сулайманов МахIаммада, ХIажиев Аьли ва м.ц.
Вай ххаллилсса хьхьичIу­ннай­шивуртту хьун даврил ххуллий Рапинащал уртакьну ва лябукку буну зий бивкIссар Райисполкомрал председательну хъунмасса хIаллай ивкIсса МахIаммадов Ярагъи, яла – Аьли­ханов Аьлихан, шяраваллил хозяйствалул управлениялул хъунаману зий ивкIсса Мустапаев Мустапа, кIулшиву ласаврил хъунаману зий ивкIсса СултанахIмадов Аьбид, райбольницалул хъунама хIакин Аьшаев Нуруллагь, РОВД-лул начальник ПаттахIов Ризван, Райпорал председательну зий бивкIсса Кьурбанова Соня ва м.ц.
Ххюра шинал дянив Рапи бакIчину Ккуллал райондалий дурссар чIярусса ххуй-ххуйсса давуртту.
Муния махъ цайми-цайми лахъа-хъунсса, республикалул лагрулийсса, къуллугъирттай Рапинал бартбигьлай ивкIсса мурадирттая, иширттая шикку гъалгъа тIийвагу бакъару. КIулнан мигу кIулссар. Шикку жу хъунмур чIурчIав дуварду ванал биографиялуву Ккуллалмур райондалул чIумуцIун бавхIумур мутталий — му ца яла яргмурну ва жучIанма гъанмурну хъанай буну тIий.
Ниттил увну там хьусса 70 шинал юбилейгу барча тIий, чIа тIий буру лакрал ххаллилсса арснан цIакьсса цIуллушивугу, лахъи­сса оьрмугу.
Ккуллал райондалул жямат­ран ина бувмур тачIав хъама­къабитантIиссар.
Нагу гай шиннардий вищал зий ивкIсса
МахIаммад Оьмаров,
ш. ЧIяйми