ЦIуллусса оьрму бутаврил цIаний

Ялун нанисса жагьилсса никирал цIуллу-сагъну оьрму бутаву мурадрай ларгсса шинал тамансса давуртту сакин дурунни панкратиондалул Дагъусттаннал цачIундур командалул хъунама тренер, МахIачкъалаллал дуккаврил управлениялул вакил, МахIачкъала шагьрулул 57-мур школалул директорнал оьрчIру тарбия баврил давурттал хъиривчу Карашатусса Аьбдулкарим Айгуновлул сакиншиндарайну.


ХI. Аьдилов
ОьрчIан тарбиялунсса дарс хьунсса ихтилатру бувссар 1-мур, 2-мур, 18-мур, 57-мур школардай, Сергокъалалив, Национал библиотекалий. ЛачIун буккаврил дунияллул чемпион КIурамахIаммад КIурамахIаммадовлул, Олимпий тIуркIурдай 2-мур кIану бувгьусса МахIаммад Ибрагьимовлул мастер-классру бувссар МахIачкъалаллал ШВМС-рай. Дзюдорал мастер-классру бувссар МахIачкъалаллал циняв школардал дуклаки оьрчIан МахIаммад Жяъпаровлул ва Жяъпар Жяъпаровлул – кIиягу дунияллул халкьуннал даражалий­сса спортрал усттарталли ва Аьра­сатнал лайкь хьусса тренерталли. ЛачIун буккаврил мастер-класс Лакрал райондалул ва Гъумучиял шяраваллил ялапарлувтуран ккаккан бувссар Аьрасатнал спортрал усттар Куршалиев Маккашариплул (лаккучури). Дагъусттаннал боевой самборал хъунама тренер Расул МахIаммадаьлиевлул «ИГЛС ММА» тIисса спортклубраву МахIачкъалаллал школардал дуклаки оьрчIан ккаккан бунни хIала-ккаласса дандибуккавурттал мастер-класс.
Субботник сакин дурну диркI­ссар 57-мур школалущал цачIу Олимпиадалий 2-мур кIану бувгьу­сса ИFС-лул даражалий биян буклакисса Олимпий тIуркIурдай 2-мур кIану бувгьусса МахIаммад Ибрагьимовлул ва кьяйдарду дакъа бияврил (бои без правил) дунияллул чемпион Рамазан Эмиев гьурттуну.
МахIачкъалаллал пляжрай оьрчIан кIюрххилсса зарядка сакин дурссар лачIун буккаврил Олимпий чемпион Ширвани Мурадовлул ва Дагъусттаннал Халкьуннал Мажлисрал депутат Амирхан Амирхановлул. Мискинсса кулпатирттал оьрчIан, инвалидсса оьрчIан ва ятинтуран ихIсандалунсса концертгу ккаккан дурссар, бахшишругу дарчIуссар, 4-мур школалун телевизоргу буллуссар генерал Муслим Даххаевлуяту. Ми­кку балайрду увкуссар Лариса ХIажиевал, Нурианна Каллаевал, Аьбдул Мурадовлул ва цайминналгу, къавтIавуртту дурссар хореографиялул ансамбльданул. МахIачкъалаллал 15-мур школалул оьрчIан «Кванториум» тIисса технопаркраву кIюрххилсса зарядка сакин дурссар Аьрасатнал лайкь хьусса тренер Аьбдулманап НурмахIаммадовлул, мува технопаркраву личIи-личIисса школардал оьрчIахь тарбиялунсса насихIатругу бувсун, миннал суаллахьхьун жавабругу дуллуссар лачIун буккаврил Олимпий тIуркIурдал чемпион Шарип Шариповлул. Гьарца нюжмардий цала спортшколалул оьрчIру бяст-ччаллайн хIадур буллай ур «Армар», «Спартак», ШВСМ клубирттаву.
Аьбдулкарим Айгуновлул ЦIусса шинал хьхьичIми гьантрай дунни оьрчIан ва чIава жагьилтуран панкратиондалул турнир. Карашатусса ХIажиев Рамазаннул микку бувгьунни 1-мур кIану.
Укунсса давуртту Айгуновлул дуллантIиссар ттинияр тиннайгу, жагьилсса ник тIайласса ххуллий тарбия даву мурадрай.