«Хъиншивуртталли дуниял ххассал дантIисса»

[dropcap]А[/dropcap]ьрасатнал ПрезидентначIасса граждан общество хьхьичIуннай даврил ва инсаннал ихтиярду дуруччаврил комиссиялул член, ДР-лул Вакилханалул жяматийсса советрал член, Москавливсса «Дагъусттан» культуралул центрданул президиумрал член Разита Мушидовалсса ихтилат.


[dropcap]О[/dropcap]ьруснал чичу Федор Достоевскийл махъру заманалуха лавхьхьуну баххана буллай, «Хъиншиврулли дуниял ххассал дантIисса» учивияв. ХIакъи-хIисав дакъа, занабикIулухгу къаялугьлай, хъинбалартту, хъиншивур­тту дурсса ишру нажагьсса хьунабакьай цIанасса чIумал. Амма, чIявусса бакъахьурчагу, бур жула дянив цаманан хъиншиву дурну дакI рахIат дуккайсса, чил буру­ккин кIибавчIуну бигьалагайсса инсантал.
Ттул ихтилат мукунминнава­сса цаннаяр – Аьрасатнал Пре­зидентначIасса граждан общество хьхьичIуннай даврил ва инсаннал ихтиярду дуруччаврил комиссиялул член, ДР-лул Вакилханалул жяматийсса советрал член, Москавливсса «Дагъусттан» культуралул центрданул президиумрал член Мушидова Разитаятур.
ЦIусса шинал байрандалул гьант­рай цила гъан-маччаминначIан биян Да­гъусттаннайн бувкIсса Разитал чIун ляркъунни «Илчи» кказитрал коллектив, танива­сса цила коллегахъул барча бан бучIанссагу.
Дирирсса сант ишла дурну, ванищал ихтилат бав нагу.

— Разитай, махъсса ппур­ттуву ина жула инсантурал итталун багьунна, вияту чIявусса гъалгъа тIун бивкIунни, хаснува соцсетирдай. КутIану виятува бусарча ччива, жула бу­ккултрангу кIулну бикIан.
— На бувну бура Хъювхъиял шяравасса Давудлул ва Ххами­с­лул кулпатраву. Ттул нину-ппу бур захIмат буллай аьдат хьусса инсантал. Жу ххюва оьрчI вайннал, хъунигу бувну, цала-цала оьрмулул ххуллийн бивчуссару. Ппу зий икIайссия таксомоторный паркраву. МахIачкъалалив цалчинсса таксирду ттул бутталли зузи бувсса. Ттул муния хъунмасса пахру бикIай. Нину дия тIюва дуруччин кIулсса, усттар­сса хозяйка. Нава щар хьуну бу­ссияв цамур миллатрал инсаннан. Ттул ташу тIайлабацIусса къавхьуна. Мадарасса бугу-бувхIуну, ахиргу кIива душнищал личIи хьун багьунни. МуницIун, хъинну къашайгу хьунав. Азаруннищал ччалай дурцири химияр­ттал ттул хасиятгу кIюла ду­ккан дуруна. Амма хьунадаркьусса захIматшивурттал на сасан бунна, кьянкьа-кьурчIи бунна. Яла-яла, ттул чIарав бия дазу-зума дакъа ххирасса ттула душру. Ттун бувчIлай бия ттунма гай ччаннай бацIан бан аьркиншиву. Мунияту, захIматсса операция бувну махъгу, яхI кьацIул бувгьуну, ттула дакI нара дуллай бивкIра. Аллагьнайн щукрур. Ттун бувчIунни чIявусса иширттаву жула бияла хъунма­сса бушиву.

— ЦIана цуксса хьуну бур вил душру? Ссаха зий бур ми?
— Хъунмур душ Зугьра Москавуллал университетраву дизайнертал шайсса факультетрай дуклай бур. Сурат дишаврил гьунар бусса бур. ЧIивимур Камила актриса, балайчи хьун ччай бур. ЦIана ганин 13 шин дур. Амма уттинин чIярусса концертирттай ва шадлугърал мероприятияр­ттай гьуртту хьунни. Душру ттула лавай бавцIусса бур.
— Ина хIакьину хъунна­сса чирилул даву дачин дурну бура.

Хъиншивур­тту дуллан ссал гьуз учин бувра ина?
— Ва инсаннан оьтту-ттур­чIавух дулайсса хасият духьун­ссар. Ттунгу ва гьавас ттула нитти-буттая бивсса бухьунссар. ЦIана куннасса каши къадиркIнугу, инсаннан кумаг бан ттун мудангу ччан бикIайва. Ттул ппу детдомрай хъуна хьусса ия. ЧIявусса ккавккун бия. Мудан икIайва, ттула оьрчIан щилчIав къаччан бикIан бан къабитанна тIий. Цувагу гьарнан кумаг бан ччисса ия. Жул шяраву акъа­хьунссар цаягу инсан ттул буттал чIиви-хъунсса кумаг къабувсса.
Буруккинттарахун агьсса, кумаграх мюхтажсса инсаннащал хьунабавкьусса чIумал чIалан бикIайссар жуламур хIалгу. Хъиншивуртту даврил инсан цувагу гьаз уллалиссар.

— Циксса инсантал бу­ккай зуйн кумаг аьркин багьлагьисса? Бюхъайрив цинявннан кумаг бан.
— Нюжмардий чанма-чанну 5-6 инсаннал оьвчайссар жучIан. Сайки цинявннан аьркинсса кумаг байссар.

— Цуку-цукунсса масъаларттащал бучIай ми?
— ЛичIи-личIисса. Дагъусттаннал Вакилханалийсса Жяматий­сса советрал «горячая линиялул» телефон мудан ттучIари дусса. Хьхьу-кьини къаувкуну зузиссар му. Кумаг аьркин багьлагьисса дагъусттанлувтурал, Москавливва ялапар хъанахъиминнал бикIу, Дагъусттанная бувкIминнал бикIу, ттучIан оьвчайссар. Махъсса ппурттуву чIявусса дагъусттанлувтал бувккунни ттуйн цIуллу-сагъшиврулшиврий Москавлив бучIан багьсса, бацIансса кIану бакъасса. Жу мукунсса инсантуран уквасса бацIансса кIанттулгу, шаннагу чIумухсса дукралулгу дузалшинна дур­ссар.
Хьуссар ишру дагъусттанлувтурахьхьун Москавлив ливтIусса гъан-маччанал жаназарду къадуллалисса, ми дулунну чIярусса арцу цIиклакисса. Жул комиссиялул члентал хIала бувххун, жула ватанлувтуран кумаг бувссар.
Жул мурад цар – захIмат­шивурттахун багьсса дагъус­ттанлувтуран кумаг баву, чIарав бацIаву. Хъинбалартту, хъиншивуртту дуллан аьркинссар, къабарчаллагьрахлу, дакIнихтуну.
— Москавлив ккав­кказ миллатрал лажин думи, дагъусттанлувтал къаххирасса бур, миннан ххуллу тIитIлай ба­къар тIун бикIай. Вин асар хьуссарив мукунсса кIанттурду?
— АцIра шин дур ттул Москавлив ялапар хъанай, ттун ттигу цалагу ттула чулухуннай мукунсса бургаву хIисав къархьунни. Инсан цува цукун сукку тIий, занакьулу икIлай урив, муниха лар­хьхьусса дикIайхьунссар мунал чулухуннайсса ургавугу, Москавлив ба­къассагу, гьар кIанайгу.

— Цими шинни вил ихIсандалул давурттахун багьну? Му чIумул дянив яла дакIний ливчIмур иш цумур хьур?
— Кумаг аьркинну ттуйнма бувксса инсантуращал на хьунакъабакьара. Ттул мурад миннан кумаг бавур. На му я нава бара, я цайминнайн тапшур бара. ТIайлассар, оьвтIун бикIай, хьунабакьин ччай буру, барчаллагь учин ччай буру тIий. Ца ппурттуву хьунабакьинсса къабувсукун, зузисса кIану кIул бувну, тIутIал кацIлищал бувкIуна ца Къизилюртлиясса хъамитайпа, ина къаккавккун, ина ххира къабувну шиха гьан дакIнил кьамул къабунни тIий. Инсан, къашавайсса чIумал, гьанавиххину, ци банссарив къакIулну икIайссар. Му ттун ттуйнува асар хьуссар. Мукун­сса чIумал чIарав авцIусса инсан хъинну бусрав шайссар.

— Ихтилат къуртал буллай, ци чIа учин ччива вин жула инсантуран?
— Ттун ччива инсантураву хъиншиву, рахIму-цIими ххишала хьуну. Мюхтажнан кумаграл ка тIитIлай, захIматсса тагьарданувун агьнал чIарав бацIлай, жула буттал буттахъал заманнай кунма оьрму бутлай жула инсантал.
Хъиншивуртталли дуниял ххассал дантIисса.

Ихтилат бувссар
Андриана Аьбдуллаевал