Лакрахь
Зува лявхъусса аьрщи,
НиттицIа лавхьхьусса маз,
Хъамабитан мабари
КьатIув лавгун мукьахгу!

Тарихирал къапурдай,
Ппухълуннал чирчу аят
Лаккучунал лугъатрай
Лахьхьин дара наслулун.

Хъиннихха дунияллий
Мазру чIявусса кIулну,
Нааьна дакъаривкьай
Ниттилмур хъамабивтнан!

«Илчи» кказит буккира,
Мунил хъар хъунна дара,
Лакрал дардру, тирхханну
Цинявннал лаласира.

Ява, пикри бувара
Ялун бучIантIимунил,
Лакри тIисса кьан-миллат,
Буссия тIий къаличIан.

Буттал шяраваллиха
ЧIиви-чIиви тIий, бизлай,
Чан-чанну тIий, чан хъанай,
Жямат ххялтIа хьуну бур
Тти Ккуллал шяравугу.

Мюрщими хъуни хьуну,
Хъуними кьатIух лавгун,
Къапулух щугълурдаву
Хъунна бава личIлай дур.

Бизар хьусса ларзурдай
Пашмансса чIавахьулттив,
ТIитIинманах ялугьлай,
Якьаману чIалай бур.

ЧIукIа-чIитIлих мякь хьусса
Бавкку-шавкку кIичIиртту,
ЩяикIанма чан хьусса,
МахIлардайсса ккурчIарду.

Аргъ дакъа, гъира бакъа,
Ялугьлай бур хьулурду,
Ялун увкIманал хъирив
Аглан хьу тIисса кунма.

Щукру
Щукру, инсаннал оьрму
Машан ласун къашайсса,
Хъус дунал хъямалашин,
ДацIан дан къахьунссия.

Щукру, Аллагьнал гьантта
Гьарнан бувккуну бусса.
ЧIярусса цачIун дурма,
Гай канай къаитайсса.

Щукру, бувккусса гьантта
Бухлавгун, ачайнигу,
Ца сурув бакъа, цичIав,
Цащалла къаласайсса.

Дунияллийсса оьрму,
ОьрчIисса бухьурчагу,
Щукру, абадул къатта
Цинявннан цасса бусса.

Циванъя
Шан-кIичIирал бакIраву
Цанъя хьунаакьайсса?
Аьраххуллийн бияннин
Циванъя кьабитайсса?

Циванъя на бюхттулну
Гьаваллавун гьаз байсса?
Циванъя хъирив яла,
Щях бищунгу битайсса?

Цанъя ттух хьусса ччаврил
Мутта муксса чIивисса?
ХIазрай хьунаавкьуну,
ХIасратрай кьабитайсса?