Райондалул бучIантIимур вайннал кIунттихьри бусса

[dropcap]Ц[/dropcap]Iуссалакрал райондалий аьдатравун багьну бур шинал ахирданий мусил медалданий школа къуртал бувсса, хьхьичIунну дуклакисса оьрчIру лахъа-хъун буллалаву. Гьашину мукунсса шадлугъ хьунни Гьамиящиял школалий.


Имара Саидова
[dropcap]О[/dropcap]ьрчIру барча бан, лахъа-хъун бан ХIажи Айдиев бакIчину бувкIун бия бусравсса хъамал:ДР-лул Халкьуннал Мажлисрал депутат Амирхан Амирханов, райондалул бакIчинал хъиривчу ХIажи ХIажиев, шяраваллал администрациярттал бакIчитал ва райондалул кIулшивуртту дулаврил управлениялул зузалт.
Мажлис тIитIлай, ихтилат бунни ХIажи Айдиевлул.
— Ххирасса оьрчIрув! ЦIусса шинащал барча буллай, чIа тIий ура зун дуккавриву ва гьа­рица бивзсса шаттираву тIай­лабацIуртту. ДакI ххари хъанай дур жула райондалий хьхьичIунну дуклакисса оьрчIру ялу-ялун гьарза хъанай бушиврия. Зуйнни хъар хъанахъи­сса райондалул бучIантIимур, — увкунни ванал.
Хъирив, дуккаврил шин хьхьи­чIунсса хIасиллащал къуртал дурсса, мусил медаллу ларсъсса оьрчIру сахIналийн буккан бувну, хасъсса бахшишру дунни райондалул хъунаманал.
ОьрчIру барча бунни Амирхан Амирхановлул:
— На хъинну ххарину увкIра ва мероприятиялий гьурттушинна дан. ОьрчIрув, кIулшивурттал зул оьрмулуву агьамсса кIану бугьлагьиссар, миннул кумаг­райнур тIитIинтIисса зул оьр­мулул язи-язими ххуллурдугу. ТIайлабацIу баннав зун, — увкунни депутатнал.
Декабрь зурул 24-нний, Республикалул Национал библиотекалуву хьусса «Интеллиада» тIисса кIулшивурттал фестивальданий кIилчинсса кIану бувгьусса ЦIуссалакрал райондалул командалухь личIиссава барчаллагь увкунни ва миннан дакIний личIансса бахшишру дунни райондалул каялувчитурал.
Бахшишру дунни ва барча бунни райондалул ва рес­публикалул олимпиадарттай хьхьичIунсса кIанттурду бувгьу­сса оьрчIругу.
Мукунма, мажлисрай барчаллагь увкунни ларгсса шинал август зуруй хьхьирийн бюкьлай бивкIсса чачаннал миллатрал кулпат ххассал бувсса ЦIуссалакрал райондалиясса ТIажиб Аьлимовлухь ва Аьбдуллагь Мадаевлухь. Жагьилтурал дурсса къучагъшиврун лавайсса кьимат бишлай, утти­гъанну ГУ МЧС-ралгу вайннан дуллунни «За спасение погибающих на водах» тIисса медаллу.
Райондалул цинявппагу школарттал дуклаки оьрчIащал хъамаллурал рирщунни дакIний личIансса суратругу.
Ахирданий цинявппагу дуклаки оьрчIан ёлкалучIасса дялахъру хьунни.