[dropcap]Т[/dropcap]тула архивравусса чагъардал вив ляркъунни 1955 шинал рирщусса сурат. Ва сурат рирщумагу Шахьуватусса МахIаммад тIисса инсан усса ххай ура. МахIаммад щархъайх, учкъулардайх уккайва, шакиллу ришлай.Сурат, ттуннарагу къакIулна, 63 шинал мутталий ладирхьуну диркIун дур.

---

[dropcap]В[/dropcap]а суратрайсса инсантал та чIумалсса Кьубиял 7 шинал школалийсса учительталли. БавцIуминнаву цалчинмур (кияха) Ккурклиятусса Жамалу­ттиннул душ Буттаева Ссапиятри. Кьубиял школалий ва зий буссия завучну, шичча лавгун махъ зий бивкIссар «ЦIусса ххуллу» кказитрал хъунаманал хъиривчуну. КIилчинмур МахIаммадлул душ ХIасанова Караматри. Хъинну оьрчIру хххирасса, оьрчIан цу­ппагу ххирасса педагогъя. Бугьара хьуну махъ, цуппалу личIлай буну, Анжилийн оьрчIачIан бивзун, бигьалаглай бур. Шамилчинмур Лисицина Верар, ва оьрус мазрал ва литературалул дарсру дихьлай буссия. Цила даву ххуйну кIулсса Вера коллективралгу, жяматралгу дянив хIурматрай буссия. Мукьилчинмур ХIанзал душ Вагьабова Назиратри – халкьуннал кIулшиву ласаврил отличник. Ванил сурат райкомрал ва ОНО-рал хIурматрал улттуйгу дикIайссия. Оьрмулул 54 шинаву аьпалухьхьун лавгссар. Шихва-шихмур МухIаммадал душ Мирзаева АьйнулхIаятри. Математикалул ва физикалул муаьллимъя. Зувирахъул шиннардий цинма ххирасса пишалий зий бивкIссар.
ХьхьичIмур кьюкьлуй щя­бивкI­миннава кияха цал­­чинма ур ШавкIратусса Ма­хIаммадлул арс Мухтаров Рамазан. Ва ­уссия школалул завучнугу, шяраваллил парткомрал секретарьнугу. Кьубату лавгун махъ зий ивкIссар ШавкIуллал колхозрал председательну, райкомбинатрал хъунама бухгалтерну. Ванала чIарав ур Шахьувату­сса Къандаев МахIаммад. Зий ивкIссар райкомкомсомолданул 1-ма секретарьну. Райкомкомсомолданул чай командировкалий Карашавгу лавгун, кIичча ма­хъунай Шахьував нани ххуллий, неххайх лавхъун най унува, чявхъа гъарал мугьали ялун бивну лавсун, ххассал къавхьуссар – га чIумал Шахьуйннал хьхьичIсса неххайх ламу къабикIайссия. Обкомкомсомолданул секретарьнугума итанссар тIисса хавар бикIайссия ваная. Шамилчинма ур Ккурклиятусса Аьвдулвагьаблул арс Магьдиев Аьвдуссалан. Ва зий уссия Кьубиял учкъулалул хъунаману цимирагу шинай. КIичча лавгун махъ, аспирантурагу къуртал бувну, хъунма­сса хIаллай зий ивкIссар элмулул аралуву. Амма Кьуби тIурча, ванан тачIав хъамакъабивтссар. Аьвдуссаланнул чIарав щяивкIун ур Оьмарил арс Оьма­ров Гьабил. Ва 900 гьантлий Ленинградуллал блокадалуву ивкIссар. Дяъви къуртал хьуну махъ цал Яру­ссаннай, яла Кьубиял учкъулалий зий ивкIссар. Мичча лавгун махъ Анжилий ттучандалий зий икIайссия. Хъирив ур Мирзал арс Мирзаев Аьвдуллагь. Зий ­уссия Кьубиял къутандалийсса учкъулалий. Яла, кулпат бувну махъ, щарссанищал архIал кIиягу дарс дихьлай бивкIссар Бархъалав. Муния махъгу, цIунилгу кIура бавну, зий бивкIссар Кьубиял учкъулалий. Аьвдуллагь жагьилну унува, вирттилиоьрчIгу махъ ливчIун, аьпалул хьуссар. Кьюкьлул шиха-шихгу щяивкIун ур зул хIурмат бусса Вагьабов Оьмахан Аьвдул-Вагьаблул арс. 1950-1951-ку шиннардий, Кьубиял къутандалий ризкьичитурал оьрчIансса учкъулагу тIивтIуну, 2 шинай на зий ивкIссара гикку. Мунияр махъ шяравусса колхозрал, советрал давурттай зий усси­яв. ХIакьину, угьарагу хьуну, сакъатгу хьуну, МахIачкъалалий арсурваврачIа, душваврачIа, ссийчIа яхъанай ура, Заннал цIимилий. Лях-карах буттал шяравусса ттула къатрах я бищунгу лагара.
Оьмахан Вагьабов,
ш. Кьуби