ЦIусса шинал кьинирду

[dropcap]И[/dropcap]нсан дакIнийсса умудру бартлагаврил кьинирдах муданагу ялугьлан икIай. Мукунсса цинявннан аьмсса кьинину жула оьрмулуву хъанай дур ЦIусса шин дайдишайсса январьданул 1-мур кьини. Хьунабакьлай бур «Ва жула байран дакъар» тIимигу. Битанну мигу цаламур аьклу-кIулшиврущал. Шин дайдихьулул кьини бигьалагай кьинилийн дагьлай душиврийн бувну, Ккуллал райондалул шяраваллаву ЦIусса шинал шадлугъру хьхьичI кьинирдай хьунни.

ЦIусса шин Хъусращиял шяраву

Дарусса кIинтнил кьини духьувкун, чансса духьурчагу чIаракIлу дусса кьини. Лакку зунттурдал дянив райондалул зуманив дирхьусса Хъусращиял шяравалу. Елка бацIан був­сса школалул хIаятрава ябивтсса чIумал, вил дакI дуссар зунттурдал исвагьишиврул гьанави­ххи дуллай. Жущалла цIусса шин хьунадакьин бувкIун бия ттарлил мурхь. Буниялагу щин пикри хьуну бивкIун бухьурчагу ва мурхь байрандалул «жалин» буван, хъинну ххуйсса пикри хьуну бивкIун бур. Туну, кIинттул гьарца зат марххалттанил кIучI дурсса чIумал, укун щюлли­сса мурхьирал лагма къавтIий ЦIусса шин хьунадакьлакьисса байран ссал къаххуйри.
[dropcap]Е[/dropcap]лкалул лагма лавгун бия школалул дуклаки оьрчIру, учительтал, оьрчIал нину-ппу, хъамал. ЦIусса шин хьунадакьлакьисса байран дачин дурна 7-мур классрал дуклаки душварал: Гъазиева Залмул ва ХIажиева Ххадижатлул. Ши­ккува чIарав бия школалул директор ХIажиева ХIулайбат, ванил хъиривма ХIажибуттаев Макьсуд, школалул завуч Гъазиев Аьбдул, Хъусращиял шяраваллил бакIчи ХIажиев Эдуард. ЧIал къавхьуну хъамалу бувкIуна Дякъил-ттатта ва Марххала-душ.
ОьрчIал щаллу бувна ЦIусса шинахасса, елкалухасса балайрду, бувккуна шеърирду. Дя­къил ттаттал буллуна оьрчIан нацIушивурттащалсса кьуцур­ттив. ЦIусса шин хьунадаркьуну махъ кIул хьуна Дякъил-ттаттану бивкIшиву школалул зузала Шагьмандарова Качар, Марххала-душну – ванил оьрчIал душ Шагьмандарова Качар. ОьрчIал байрандалул сий гьаз дуван бувкIун бия Хъусращиял шяраваллил культуралул зузалт: Сулайманов Марсел, Ванатиев Гриша, Ванатиева Марина, Даллаева Зульфия. Рязину ливчIуна байрандалийн бувкIми. Мюрщиминнан Дя­къил ттаттал кьуцуртту буллукун, бугьараминнан нахIусса дукралул ссуп­ра тIивтIуну бия школалул директор ХIулайбат Олеговнал.
Барча цIусса шин, Хъусращиял жямат!

ЦIусса шин Ваччиял шяраву

[dropcap]В[/dropcap]аччавсса майданнив ЦIусса шин хьунадакьлакьисса тяхъашивуртту нанисса кьини дарусса, ххуйсса хьуна. Шикку байрандалувух гьуртту хъанай бия райондалул циняв шяраваллал культуралул зузалт ва цаппара школарттал дуклаки оьрчIру. СахIналул хьхьичI бия ЦIусса шинал «жалин». Ванил лагма къавтIий, балайрду тIий бия личIи-личIисса вацIлул жанавартрал нетIри лархсса оьрчIру ва бугьарами.
ЦIусса шин хьунадакьлакьи­сса тяхъашивуртту тIиртIуна Ккуллал райондалул администрациялул вивсса политикалул отделданул каялувчи Хизриев Шамххалал. Райондалул жямат ванал барча бувна райондалул бакIчинал чулухагу, цала чулухагу. Гания гихунмай мажлисрай каялувшиву дуллай бия Дякъил-ттатта ва Марххала-душ. Вайннал къавтIун бивз­сса, балайрду увкусса оьрчIан нацIушивуртту дусса кьуцур­тту буллуна. СахIналий ккаккан дурна райондалийсса шяраваллал культуралул зузалтрал хъинну ххуйсса концерт. Балайрду увкуна Саманият Аьлиевал, Басират ХIусайновал, Гриша Ванатиевлул, Марина Ванатиевал, Шавлухъ СалихIовал ва цайминналгу. Ккаккан дуруна мукунна къавтIавурттугу, Ккуллал спортшколалул гимнастикалул секциялийн заназисса душварал номердугу. Хьуна хъярч-махсаралул номердугу.
Ккуллал райондалул бакI­чинал хъиривчу Сабрина Илиясовал бувсуна Ккуллал райондалул чулухасса Дагъусттаннал Халкьуннал Мажлисрал депутат Расулов Аьбдуллалгу ЦIусса шин барча дан гьан бувшиву арцуйнусса ва бахшиширттансса ссайгъатру: ятинтуран, бюхъу чансса бугьараминнан, ххуй­сса кьиматирттай дуклакисса оьрчIан.
Ваччавсса тяхъашивуртту лахъи ларгуна ахттакьуннин.
Шиккува кIицI буван, нава гьуртту къахьурчагу, райондалул вайми шяраваллавугу хьунни ЦIусса шин хьунадакьлакьисса байранну, тяхъашивуртту.
Барча, Ккуллал райондалул жямат, ЦIусса 2018-ку шин!