Мякь къалиххайсса «Ханума»

А. Къапиевлул цIанийсса Лакрал музыкалул ва драмалул театр­данул ккаккан бунни гуржиял драматург Авксентий Цагарелил чивчусса классикалул водевиль «Ханума».


Зулайхат Тахакьаева
Спектакльданул премьера хьуссар 2015 шинал. Муния шинмай му бур театрданул репертуардануву. 2016 шинал Ух­ссавнил АьсатIиннал Владикавказ шагьрулий хьусса «СахIналун дазу дакъассар» тIисса дунияллул халкьуннал фестивальданий Кабатол роль дургьусса Да­гъусттаннал халкьуннал артистка Луиза Шагьдилова лайкь хьу­ссар «КIилчинмур пландалул яла хьхьичIунмур хъамитайпалул роль» тIисса дипломран.
«Ханума» цалчинма-цалчин бивхьуну бур 1972 шинал Ле­нинг­радуллал Хъунмур драмтеатрданул, режиссер Георгий Товстоноговлул. Спектакль ккаккан бувну бур шанттуршилва. Репертуарданувагу му букьан багьну бур, тамашачитурал иттала багьну тIий бакъача, цавай актертал театрданува лавгун, цавайгу оьрмулул бугьара хьуну тIий. Миннал кIану бугьансса жагьилтал тIурча, биялну бакъа..
Му бишинсса пикри ччянива бивкIун бур Лакрал театрданул каялувчитуралгу. Амма бюх­ттулсса даражалул спектакльлу лайкьсса даражалий бишиншиврул аьркинну дур хъунисса каширду. Ахиргу, чулийн дурккунни ххаллилсса проект. Режиссер – Дагъусттаннал халкьуннал артист Аслан МахIаммадов. Костюмру дурурххуну дур Дагъусттаннал художественно-графический институт къуртал буллалисса студентътурал (ва хьуссар миннал дипломрал проект, каялувчи – цIанихсса модельер Вера Агошкина). ХьхьичIавасса Ттуплис ккаккан буллалисса декорация щаллу дурну дур Дагъусттаннал лайкь хьусса художник Аскар Аскаровлул. Спектакльдануву гьурттуну бур сайки цинявппа актертал ва балетрал труппа.