ЦIуссалакрал райондалул агьалинан ЦIусса шинал дайдихьулий ххаллилсса бахшишну хьунни ЦIуссалакрал ва ЦIуссачIурттащиял шяраваллаву оьрчIал багъру тIитIаву.
Имара Саидова
[dropcap]Ш[/dropcap]адлугърал даражалий ми багъру тIитIлатIисса мажлисирттай гьуртту хьунни АьФ-лул Федерал Мажлисрал Думалул депутат Юрий Левицкий, ДР-лул экономикалул министр Раюдин Юсупов, ЦIуссалакрал райондалул бакIчи ХIажи Айдиев, ЦIуссалакрал райондалул агьали бизан баврил ва Аухуллал район цIудуккан даврил масъаларттаха зузисса управлениялул хъунама МахIаммадаьли МахIаммадаьлиев, ДР-лул Халкьуннал Мажлисрал депутат Амирхан Амирханов ва Дагъусттаннал ХIукуматрал председатель Аьбдуссамад ХIамидов.
ЦIуссалакрал шяраву тIивтIунни 140 оьрчIансса кIану бусса, гьарца шартIирдал дузал бувсса садик. ЦIуну тIивтIусса садикращал жямат барча буллай, ХIамидовлул кIицI лавгунни махъсса ппурттуву Дагъусттаннай школалийн гьаннинсса кIулшивуртту дулаврил идарарттах хъуннасса къулагъас дуллай бушиву. Ванал мукунма бувсунни вай садикру Ухссавнил Ккавкказуллал федерал округ хьхьичIунмай баву мурадрайсса программалул лагрулий бувшиву. Барчаллагь увкунни строительствалул давриву кабакьу бувсса АьФ-лул Ухссавнил Ккавкказуллал иширтталсса буллалисса министр Лев Кузнецовлухь ва мунал хъиривчу Одес Байсултановлухь.
Хъирив хъамаллуращал шадлугърал даражалий тIивтIунни «Ссурулккуртта» тIисса 90 оьрчIансса кIану бусса садик ЦIуссачIурттащиял шяравугу.
Садикру тIивтIуну махъ Аьбдуссамад ХIамидовлул дуллунни республикалул каялувчитурал чулухасса бахшишру.
АьФ-лул ПаччахIлугърал Думалул депутат Юрий Левицкийл цала ихтилатраву кIицI лавгунни Аьрасатнал ва Дагъусттаннал каялувчитурал кIулшивуртту дулаврил ва культуралул масъаларттах хъуннасса къулагъас дуллай бушиву.
ЦIуссачIурттащиял шяраваллил жяматрал чулуха цинявппагу хъамаллурахь барчаллагь увкунни АхIмад Нахаевлул.
