Хъамаитан къашайсса инсаннаясса махъ

1954-55-ку дуккаврил шинал на дуклай буссияв Гъумучиял дянивмур даражалул школданий 10-мур классраву. Жул класс­рал каялувчину уссия Лукьманов МахIаммад. Ганал жухь цалчин­сса кьинива увкуна: «ОьрчIрув, зул гьашинусса шин хъинну агьамсса шинни, хIарачат бан аьркинссар, школагу къуртал бувну, гихунмайгу дуклан буххан. Эбрат ласун архну гьан аьркин бакъар. Вана жула школданий зун увкIун вава школа мусил медальданий къуртал був­сса жагьил. Москавлив Ломоносовлул цIанийсса щалагу билаятрайх цIа дурксса университетгу ЯтIул дип­ломрай къуртал бувну, жучIана зана хьуну ур», — куну.
[dropcap]А[/dropcap]строномия так 10-мур класс­раву дакъа къадикIайвахха. Цу учIантIиссаривгу кIулну бакъая… Увххунни классравун я бацIансса жагьил. Варх увкуну бивзру лавай. Иминну классрахгу, оьрчIахгу урувгун, бивзрув-бурувгу куну, щябивтунну. Жун бувчIуна: ца аьжаивну махIаттал хьусса куна ия цува жу кьамул увсса куццуй. Мунан кIулну бакъаяхха жухь МахIаммад Лукьмановичлул увкумур. КутIану учин, жул дянив хъинну гъилисса, вихшалдарайсса ара хIасул хьуна. Гъирарай вичIи дирхьуну бикIайссияв Нураттин МахIаммадовичлул бусаймуних. Элмулия жун кIулну бикIан аьркинмур мунал, учебник­рай бакъассагу, чIявусса бусайва.
ХхюцIаллий мяйра шинни ттул ттулагу школданий зий. Мунийн бувну бюхълай бур дахьа зун увкIсса учительнал бюхъу-гьунарданул кьимат бищунгу.
Оьрус мазрай буссар аькьил­сса махъру: «Сын отца боится, потому что любит, а не потому любит, что боится». Жугу нигьа бувсун бикIайссияв Нура­ттин МахIаммадович рязи акъасса гъалатI иткъаххяххан.
Мунал чIявуну учайва: «Во всем должен быть порядок, ищите порядок внутри себя, остальное приложится». Оьрмулухунсса программа.
Инт дуркIун, гъили дагьсса чIун дия. Нураттин МахIаммадовичлул увкуна: «ОьрчIрув, жува ссавний­сса цIурттах бурувгун, цаппара лав­хьхьумур тасттикь бан шайрив кка­кканну. Лякъияра кIира хъатуксса чаннасса пюрун. Га пюрун ца чулуха кIурал бара». ЦIурттал дурцIуну ссав дия. Школданул хIаятраву дирхьуна караматсса дарс.
Мукьилчинмур четверть дайдирхьуну ца-кIира нюжмар ларгсса чIумал увкунни: «ОьрчIрув, на баян буллай ура конкурс: ва лу­ттирал махъра-махъсса чIапIуйсса «ЦIурттал карта» хъунна дан. Циркуль цуксса тIитIин хъанай дурив, муксса круг дикIан аьркинссар, бякъайкьуну масштабру хIисав бувну».
Цимигу ватман зия хьуна, цимигу хьхьу гьан дурссия карта дуллай. .. Ахиргу, ттул карталун буллуна 1-мур кIантту (пахру буллай бакъарача, бивкIмур чичлай бура). Жул хъинну бюхъу бусса, итххявхсса оьрчIругу, душругу буссия. Гьаксса ххуйсса давуртту дия чIявуминнал. ХIазран бакъая жул дянивату кIия медалистгу увксса: Илиясов Илияс ва Рамазанов Юнус.
Гьаннайсса, къуртал барду школагу, кюрттарава читIул оьрчIру кунма, левххун лавгру шагьрурдайх. На бувхссияв пединститутравун, ­оьрус мазрал ва литературалул учительница хьун.
Ттунма яла дакIний ливчIсса ца иш хьуна цамургу. На зий буссияв Хъунайннал школданий, му дия 1964-65-ку дуккаврил шин къуртал хъанахъисса чIун. На цалчинсса оьрчIру (выпуск) итабакьлай буссияв. Га чIумал чичрулулми экзаменнайн Гъумучату чара бакъа ОНО-рал вакил учIайссия. Математикалул экзамендалийн увкIунни Нураттин МахIаммадович. Гьай-гьай, на хъинну ххари хьура. Школданул директорну уссия АхIмадов Шихамир ХIажимахIаммадович, ттула лас. Ми кIиягу гьалмахталгу бия, гъанчугу бия, Нураттин МахIаммадовичлул кулпат, Басират, Шихамирдул хъинирву бия. Амма цинявннан кIула Нураттин МахIаммадович хъинну тIайлашиву дуруччайсса инсан ушиву. Экзаменгу къуртал хьуну, давуртту ххал дуллалисса чIумал, ялун ливчуна 1-мур вариантрал задача, параграфрай ккаккан був­сса куццуй къабувну, лултту ххуттай ккаккан бувсса 2-мур кьяйдалий бувну бушиву оьрчIал. Учительнал, га кьяйда бигьасса дуну, гукун ла­хьхьин бувну бия. Кьиматру ца баллданул ялавай бан багьлай бур тIисса Нураттин МахIаммадовичлул чIу баллай бия дирекциялува. «Гьуя, ттула классрал отличниктал, цалчин итабакьлакьисса ххирасса оьрчIру, тти цири байсса!» — тIисса пикри щурун бивкIунни ттуву. Вийн оьвтIисса инсан ур тийх увкуну, класс­равун увцуну, миннат бав Нураттин МахIаммадовичлухь: «Та ттул классри, тайннай тахсир ба­къархха, лахьхьин бувсса куццуй бувну бур задача. Агарда бюхълахъисса иш бухьурча, маялавай бару кьимат, марцIсса ххювардай дуклаки­сса оьрчIрур тай», — учав. Навагу бура къурхъ дарцIуну кьакьарттуй.
«Мукун къума лаглан бикIай­ссарив, паракьат хьу, ххал баннуча», — увкунни. Увххунни ялагу дирекциялувун. Тива буккайсса чIумал, тайннал симаннах бурувгун, бувчIуна ттун иш ххассал хьуну бушиву.
Жул школданий ххуйсса ­аьдат дуссия: экзаменаторнал ссупра тIитIайссия. Чара бакъа музыкалулмур бутIагу бикIайссия. Жущал зий ия хъинну бюхханну скрипкагу, мандолинагу бищайсса ­Ахъай ТIагьирович, мандолина бищайсса Шагьабуттин АхIмадович, Расул АхIмадович (аьпа баннав шамунналагу). Дия ччергъилу, дачIу. Шиккува учин, Нураттин МахIаммадовичлунгу хъинну музыка ххирая. Бищай­ссия пианино, аккордеон, мандолина. Лугъатрай, ца бюхханну, балай учайва кIанийн дуртун макьангу. Най бур мажлис. Нура­ттин МахIаммадовичлухьхьун махъ буллунни. Ивзунни лавай: «Нану, Къистаман, бацIу чIарав, — увкунни. – Бурги, гьалмахтал, на хIакьину ва Маччайннал махIлалийн хъинну ххарину увкIра. Шунияту­сса бур ттул кулпат, бачIи коллективгу ши­кку Шуниятусса бур. Хьунни цахъи нава рязи акъасса иш, хъуннасса диялдакъашиву дакъанугу. На, ягу Шихамир гъансса уну, гьалмахчу уну дакъар кIукIлушиву дурсса, ягу на зул куяв уну тIийгу дакъар. Вана ва ттула ученицал хIурматранни. На цалчин зун айивхьусса чIумал, ванихь дарс дирхьуссар. Хъинну дарсирдалгу хIарачат байсса, итххявхсса ученица бия. Ванил хъунна дурсса «ЦIурттал карта» на ттигу ишла дуллай уссара дарсирдай. Ттун ина мудан дакIний буссара. Ина бусравсса учительница шавриву, чансса бунугу, ттулагу бутIа бу­ссар тIиссара», — увкуна Нураттин МахIаммадовичлул.
Яла, пишгу куну, ххи бувна: «Ца балай учин багьантIиссар тти вин на дурцусса макьандалухун, вил оьрчIан «ххюварду» хIазран бивхьуссарив жу», — куну. Зия байххивав ганал махъ, увкуссия балайгу.
Бусиярала, хъамаитан шайссарив укунсса учитель? Цал аьпа баннав, цал уманахьхьун цIуллушиву дулуннав!
ДакIнихтуну барчаллагьрай бура Нураттин МахIаммадовичлул аьпа абад бан дакIнийн багьну, сакиншинна дурминнайн. Му мунал, махъ бакъа, хIалал бувссар.
Къистаман
АхIмадова (Басриева),
МахIачкъалаллал 36-мур школданул учительница