[dropcap]А[/dropcap]фриканал дунгъузирттал тIаоьн (Африканская чума свиней (АЧС)) ппив шаврил хьхьичIалу кьукьаву мурадрай ДР-лул Россельхознадзорданул управлениялул инспектортурал ххал дуллай бур ДР-лул ТIабиаьт дуруччаврил ва экологиялул министерствалущал кьутIирду чирчусса авлий буккаврил хозяйствартту.
ХIасан Аьдилов
[dropcap]Х[/dropcap]Iакьинусса кьини ххал дурну дур 6 мукунсса хозяйство Бабаюртуллал, Къизлардал, Ккуллал, Лаващиял, Рутуллал ва Ххунзахъиял районнай. Миннува гьарцаннуву ляркъуну дур ветеринариялул законну къадуручлачисса цаппара диялдакъашивуртту. Микку бакъар, вахIшисса хIайвант бивххун, бахIахъру байсса кIанттурдал марцI-чапалшиврул ялув бацIаву дуллай. Авлий буккаврил луртанну (охотничьи ресурсы) лахъай азардая буруччинсса давуртту дуллай бакъар, ягу миннухсса къулагъас чансса дакъа дакъар. ХIайвантран бичайсса ярма ласайсса бур миннуцIунсса документру бакъана. Ххал бигьавурттайну ашкара хьуну бур цаппара авлий буккайминнал къулагъас къадайсса душиву ав бувсса хIайвандалий АЧС-рал вирус душиврух (ягу дакъашиврух). Инспектортурал дурсса давурттайну чивчуну бур 4 протокол. Чивчуну бур диялдакъашивуртту духлаган даврил хIакъиравусса маслихIатру, ми давуртту биттур дансса чIунгу ккаккан дурну.
Африканал дунгъузирттал тIаоьн жулла республикалий ашкара хьуну дакъар 2010 шиная шиннай. АЧС-рал къашавайну бивкIсса чIявусса вахIшисса дунгъузру (къабанну) ливтIуну лявкъуссар 2010 шинал мартрай «Дагестанское» тIисса опытру байсса авлий буккаврил ва балугъру лувгъи байсса хозяйствалий.
ЦIанасса ппурттуву республикалий дакъассар дунгъузру ябайсса ва дунгъузрал дикIуя цайми дукиялул сурсатру дайсса предприятияртту. Къизлардал ва Тарумовкаллал районнай инсантурал ябуллай бур (ЛПХ) 637 дунгъуз. Миннуяр ххишала республикалий бур 3200-ннияр ххишаласса вахIшисса дунгъузру. Ми къашавай шаврил ялув бацIаву дуллай буссар.
