Декабрь зурул 12-нний МахIачкъалаллал 7-мур гимназиялий хьунни шадлугърал мажлис. Шикку гьуртту хьун бувкIун бия Аьрасатнал Виричу Загьид Загьидов, ДР-лул Халкьуннал Мажлисрал депутат МахIаммад Кудиев,ДР-лул Жяматийсса палаталул член Ссапарбаг Аьбдуллаев, политикалул элмурдал доктор, профессор Марзият Буттаева, МахIачкъала шагьрулул администрациялул бакIчинал хъиривчу Запир Алхасов, Дагъусттаннал МВД-лул Миграциялул управлениялул хъунаманал хъиривчу Дауд Аьбдуллаев.
Бачин бувну ия мажлис ванил сиптачи Да­гъусттаннал МВД-лул Миграциялул управлениялул хъунама МахIаммад МахIаммадов.

---

А. Аьбдуллаева
БатIаврил мурад бия 7-мур гимназиялул дуклаки оьрчIан шадлугърал даражалий Аьрасатнал паспортру булаву. Паспортру буллунни 12 дуклаки оьрчIан. Мукунма Аьрасатнал гражданиннал паспортру буллунни уттинин Аьрасатнал гражданство къадиркIсса, Украиннаву, Азирбижаннаву, УзбакIнаву ялапар хъанай бивкIсса, утти Да­гъусттаннайн зана хьусса жула ватанлувтуран ва жучIава ялапар хъанан ччисса дазул кьатIаллил инсантуран. Мукун­сса 8 инсан ия ва кьини Аьрасатнал паспорт ласун увкIун.
— ХIакьину паспортру ласласисса 14 шинавусса оьрчIру-душру Дагъусттанналгу, Аьра­сатналгу бучIантIимурди. Вайнная хьун бюхъайссар хьхьичIунсса паччахIлугърал ишккаккулт, аьралуннал хъуними, депутатътал, аьлимтал. ОьрчIахьхьун паспортру жула билаятрал агьамсса закон кьамул дурсса Конституциялул кьини булавривугу цила тIилисин буссар.
Ххирасса оьрчIрув! Утти зу оьр­мулул цIусса шачIан­ттуйн лавхъссару. Зуй­сса жа­ваблувшиннагу, зуясса тIалавшиннардугу утти ххишала хьуссар. Умуд бур зуяту жула республикалулгу, билаятралгу цIа бюхттул дансса инсантал хьун­ссар тIисса, — увкунни МахIаммад МахIаммадовлул.
Паспортру ласласиминнан тIайлабацIу чIа тIисса ихтилатру бунни мажлисрай гьуртту хьун бувкIсса хъамаллурал.
— Ххирасса оьрчIрув! Зун пахру бикIан аьркинссар зува Аьрасатнал граждантал бушиврия. Ттун ччива зуяту хIакьсса патриотътал хьуну, ччива зу бу­ттал буттахъая шихуннай нанисса жула аьдатругу, аслийсса культурагу дурурччуну. Ччива зуяту, жула бава-ттаттахъул кунмасса, уздансса, яхI-къирият дусса инсантал хьуну, — увкунни Марзижат Буттаевал.
Паспортру лавсун махъ оьр­чIалгу, хъамаллуралгу цачIу бав­цIусса суратру рирщунни.