Язиминнувух – Дагъусттангу

[dropcap]В[/dropcap]ай гьантрай Санкт-Петербурграй чулийн бувккунни Дунияллул халкьуннал дянивсса VI культуралул форум. Мунивух гьуртту хьун Дагъусттанная лавгссия культуралул министр Зарема Буттаева бакIчисса делегация.


[dropcap]Ф[/dropcap]орумрал лагрулий шагьрулул 102 майдандалий хьуссар чIярусса шадлугъру – цинярдагу 1,5 азаруннийн дирсса, хьунабакьавуртту, чирчуссар уртакьшиврийсса зузаврил икьраллу. Аьрасатнал регионная ва чил билаятирттая форумрал давривух гьуртту хьуссар 20 азарунния ливчусса инсантал, 60-ксса делегация.
Ва форумравух махъсса шиннардий Дагъусттангу гьуртту хъанай бур, республикалул халкьуннал авадансса культура, багьу-бизу ккаккан буллай, Аьрасатнал ва чил билаятирттал хьхьичIунсса пишакартуращал архIал тарихрал ва культуралул ирс буруччаврил масъалартту ххал бигьлай.
Культуралул форумрал лагрулий хьусса Аьрасатнал Культуралул министерствалучIасса Культуралул ва Туризмалул координациялул советирттал цачIусса батIаврий баян бунни культура хьхьичIуннай нанисса бущилийн бувну Дагъус­ттан бухлай бушиву хьхьичIунсса регионнал «топ-10-ннивун». Му кIану тасттикь буллалисса чагъар буллунни Зарема Буттаевахьхьун Аьрасатнал культуралул министрнал хъиривчу Алла Маниловал.
Форумрал лагрулий Зиябуттин МахIаммадовлул «Пери» тIисса ихIсандалул фонд лайкь хьунни «Лучший проект музеефикации объектов культурного наследия» тIисса номинациялий «Феникс» премиялун, «Дом Петра Первого в Дербенте» музейрал комплексрахлу. ДакIнийн бутан, ва музей Зиябуттин МахIаммадовлул фондрал тIивтIуссар 2015 шинал, «Сумма» Группалул чIарав бацIаврийну, Дарбант шагьрулун 2 000 шин шаврин хасну.

ХIадур бувссар
Бадрижамал Аьлиевал