ЦIанакул оьрчIру дуккаву хьхьичIунну бакъар, интернетрава буклай бакъар, смартфоннахун, гаджетирттахун багьну бур тIий, бювкьу-аьйрду дуллай бур учительталгу, нитти-буттахъул цивппагу.

[dropcap]А[/dropcap]мма бур оьрчIал тарбиялул ва миннал кIулшивурттал ялув цIакьну бавцIусса нитти-буттахъулгу. МахIачкъалалив 26-мур школданий 8 «3» классраву дуклакисса, 1-мур ЦIувкIратусса Рамазанов Султангу итххявхсса, пагьму-гьунарду бусса оьрчI ур. Ванал нину Улияна Оьмариева бур, оьрчIал хайр-мюнпатранну чIун гьан дулланшиврул, ми спортрахун, исккусствалухун ва цумур-дунугу творчествалухун машхул буван аьркинссар, нитти-буттал буржри ми ссаха зун, ци лахьлан гъирану бурив кIул бувну, миннал чIарав бацIан тIий. Ванил кIиягу арсгу дарсругу, спортгу, магьирлугъгу ххирасса бур. Султаннул ххюва класс къуртал бувну бур 11-мур школданий. Тиккувасса магьирлугърал школалий акробатика ва пагьламаншиву лахьлай ивкIун ур. ЦIанакул 26-мур школданийгу дуклай, 4-мур музыкалул школалий фортепиано лахьлай ур.
Уттигъанну Пятигорскалий хьусса, Аьра­сатнал регионнал кубок ласунсса соревнованиярттай Султаннул цалчинмур кIану бувгьуну бур. Ххувшавурттал хъиндайдихьу хьуннав, гихунмайгу тIайлабацIу баннав!

П. Рамазанова