[dropcap]С[/dropcap]айки 3 нюжмар хьунни МахIачкъалаллал майданнив «Горзеленхозрал» зузалт ЦIусса шинал байрандалул хьунийнсса хIадуршиннараха зий. Хъунмур чIунгу ларгун дур «ВацIлул аьнтIикIа» батIлай.ЦIана тIурча, му чIюлу буллалисса давуртту най дур. Хъун шагьрулул шадлугърал лишансса Хъун-Ёлка чIюлу-кьюлу баншиврул, цIай-цIай тIисса чарсри, арцу-мусил рангирал ххаллу дакъасса, ххалаххай 1500 игрушкагу лахъан хIадур дурну дур.

---

З. АьбдурахIманова
Хъун-Ёлка тIитIлатIисса агьаммур шадлугъ шагьрулул майданнив хьунтIиссар декабрьданул 25-нний. Шикку, гьар шинах кунма, магьравасса персонажругу гьуртту­сса, мюрщултрансса тяхъашивур­тту нантIиссар. ОьрчIру ва миннал нину-ппу шадлугърай хьунабакьлай, миннащал хъярч-махсартту, тIуркIурду буллантIиссар Дякъил Ттаттал ва Марххала-душнил.
Мура кьини каникуллал гьант­рай шагьрулул магьирлугърал школарттал дуклаки оьрчIал, театрданул артистътурал, МахIачкъалаллал Культуралул управлениялучIасса ОьрчIал филармониялул чIава балайчитурал хIадур бувсса мюзикллу нантIишивугу баян бантIиссар.
ХьхьичIми шиннардий кунна, МахIачкъалаллал хъун майданнив нахIусса буркив, кIирисса ххюлтIукурду, нацIушивуртту, нацIу щинну дахлансса шадлугърал ярмукIагу тIитIинтIиссар. ЩурунтIиссар чIивитIулт ххари буллансса аттракционну, оьрчIи-кIурисса рангирдайсса светодиод­рал арт-объектру.
Ва бакъасса, МахIачкъалаллал личIи-личIисса кучардай зунтIиссар ттарлил хIавирду бахлантIисса базардугу. Мукунма вай гьантрай шагьрулул оьрчIал багъирдаву, байбихьулул классирттаву тяхъашиврул шадлугъру дуллантIиссар.
Майданнивсса хIадур­шин­дара­цIун мукунма чIюлу буван­тIиссар шагьрулул паркру ва сквердугу. Ларгмур шинал кунм
а, гьашинугу Редукторный поселокрайн нанисса ламул ялттусса иллюминация цIу дуккан дурну, ламу чанна лахъан бантIиссар. Шагьрулул кафе-рестораннаву, ттучаннай ва личIи-личIисса идарарттайгу, елкарду бивхьуну, хьулу-чIавахьултту чIюлу бавриха зий бур.
ЦIусса шинал байрандалул хьхьуну, декабрьданул 31-нний, МахIачкъалаллал ссавруннайн итадакьинтIиссар ялун нанисса шин хьунадакьлакьисса шадлугърал салютру. Му шин цурдагу Ккаччилли тIар. Бавссарив хавар! Ккаччилъя тIар, ччитулъя тIар, так тIайлабацIуртту бусса хьуну ля­къиннав!