ЦIусса бакIчинащал цIусса умудру

[dropcap]Н[/dropcap]оябрь зурул 25-нний Москавлив Аьрасатнал Элмурдал академиялул Хъунмур залдануву хьунни Аьрасатнал журналистурал ХII-мур съезд. Муний гьуртту хьунни билаятрал 80 региондалия бувкIсса 700-ннийн бивсса делегатътал. Дагъусттаннал журналистурал делегация ва съездрай бия яла хъунмур — 30 инсан. «Илчи» кказитрая буссияв хъунама редактор Руслан Башаев ва на.


Зулайхат Тахакьаева
[dropcap]Т[/dropcap]арихраву личIансса съездран ккалли буллай бия делегатътал ва съезд, кIира сававрайн бувну. Цалчин, билаятрал яла хъунмамунин ккаллисса творчествалул союзрай 25 шинал манзилданий каялувшиву дуллай ивкIсса Всеволод Богдановлул цала хушрай къабивтунни Аьрасатнал Журналистурал союзрал хъунаманал къуллугъ. Съездрай хIукму бувну ванан дуллунни «Аьрасатнал журналистурал бусравсса хъунама» тIисса цIа. Цувгу хьунни Аьрасатнаву ва цIа цалчин ларсма.
Буттал кIанттул журналистикалул легенда тIий бия Богдановлуйн ихтилатру буллалими. Хъунмасса барчаллагьрай кIицI лаглай бия билаят пуч-палачат хьусса 90-ку шиннардий союзрал бакI дургьуну, му ппив хьун къабитаву, Аьрасатнал журналистика дирчIан къаритаву. ПаччахIлугърал чулуха цукунчIавсса кумаг бакъанма так цала каширдацIух бакI буккан був­ссар союз.
Сайки циняв регионнайн ив­ссар, цал сипталийну чIявусса творчествалул проектру чулийн бувкссар, тIий бия. Миннува ца яла хьхьичIунссаннун ккаллиссар гьарца шинал Дагомысрай шайсса прессалул фестиваль «Вся Россия».
КIилчин, бунияла сенсациялун ккаллисса иш хьунни ттинин Аьра­сатнал Журналистурал союзрая батIулну диркIсса Москавуллал, Санкт-Петербургуллал ва Татарсттаннал цайнура цирдасса союзру Аьрасатнал союзрацIун цачIун хьун ччай, миннал чулухасса вакилтал съездрай гьуртту шаву.
Чачун Аьрасатнал журналистурал союзрал муттаэну ивкIсса Москавуллал журналистурал союзрал хъунама «Московский комсомолец» кказитрал хъунама редактор Павел Гусев ахиргу мукIру хьуну уну­ккар журналистурал дянив дачIин-дитансса дакъашиврий. «Пре­ссалул хьхьичI хъинну бунияласса масъалартту бур, чIявусса суаллу бур цачIу ххал бигьинсса, куннащал кув бавкьуну бакъа дузрайн буккан бан къабюхъансса. Гихунмай жува ппивну бикIан къабучIиссару,» — увкунни Гусевлул.
Мукьра шинай Журналистурал союзрал дурсса даврил хIасиллая бусласисса докладраву, махъру лавхъминнал ихтилатирттаву кIицI лавгсса цIуцIи кIантту бия щала дунияллийра яларай дагьну нанисса СМИ-рдайнсса вихшала зана даврийн, жагьилсса ник журналистикалухух гьан даврийн, журналистнал мюхчаншиву дуруччаврийн, му пишалул ихтиярдал статус лахъ баврийн, «Аьрасатнал Почталущал­сса» буруккинтту чулийн бутаврийн багьайсса ва цаймигу.
Цала кIанттай итанманал цIа цала Богдановлул рирщуну дия. Телепродюсер, кинодокументалист Аьрасатнал журналистурал союзрал секретарь Владимир Соловьев (Россия 2 каналданий ток-шоурду дачин дурма Соловьев акъар ва).
Угу увчIунни чIявуминнал чIурду буллуну. ЦIусса уставрайн бувну, ва къуллугърай ацIан ихтияр дур кIира чIумуйсса.
Владимир Соловьевлул укун кIицI лавгунни цала программалул гьануми мурадру. «Жунма багьлай бур журналистнал пишалул статус цIусса даражалийн буцин­сса давурттал ялув зун. Совет заманнай кказитрай бувксса мукъул кьимат цукунсса бивкIссарив жунма гьарцаннан дакIнийссар. Критика дуллалисса статья сававну цумур-духьурчагу ранграл каялувчи партбилетрацIа хьун бюхъай­ссия. Жунма кIулли хIакьину печатьрайсса мукъулмур кьиматгу.
Съездрай бувчIунни журналис­турал союзрал цIусса секретариат. Мивун увххунни ттинингу Аьрасатнал журналистурал союзрал секретарьну ивкIсса Дагъусттаннал журналистурал союзрал хъунама Аьли Камалов.
Аьли Камаловлул ихтилат бунни миллатирттал мазурдийсса пресса буруччаврия, Дагъусттаннал журналистал литIаврийн дагьайсса царагу дело аьч дурну дакъашиврия, шиннардий чулийн къабуклакисса ливтIусса журналистурансса гьайкалдания, Дагомысрай хьусса фестивальдания махъ чулийн бу­ккан бувсса проектирдая, Ухссавнил Ккавкказнаву журналистурал пишакаршиву ларай дансса школа тIитIинсса пикрилия. Бувсунни Аьрасатнал ПаччахIлугърал Думалул информациялул политикалул, информациялул технологиярттал ва связьрал комитетрал хъунама Аьрасатнал Журналистурал союзрал секретарь Леонид Левиннул махъ буллушиву ми проектру чулийн буккан бан кабакьу бан ва регионал СМИ-рдах къулагъас ххишала дан.
«На хъинну ххари хьура уттинин Аьрасатнал журналистурал союзрая батIулну бивкIсса союзру цачIун хьун хIадурну бушиврия. Павел Гусевлухь тавакъю бавияв «Московский комсомолец» кказитрай ккавкказнал миллатирттайн­сса хIусутшиву лагь дувара куну», — увкунни Аьли Камаловлул.
Владимир Соловьевлул кIицI лавгунни региональный СМИ-рдан арцу диял хъанай дакъашиву. Миккува ххи бунни съезд дикIан хьхьичI гьантрай ПаччахIлугърал Думалул кьамул бувшиву бюджет, миннува регионал СМИ-рдан кумагран итабакьин ккаккан бувну бушиву 200 миллион къуруширттал.