Уттигъанну Каспийскалий С. Агъабабовлул цIанийсса музыкалул школалий хьунни шагьрулул цалчинсса тIивтIусса скрипачтурал конкурс. Му хас бувну бия Каспийск шагьрулун 70 шин шаврин.
[dropcap]К[/dropcap]онкурсравух гьуртту хьунни Каспийск ва МахIачкъала шагьрурдаясса дуклаки оьрчIру.
Шадлугъ тIитIлатIисса ихтилат бунни шагьрулул бакIчинал хъиривчу Людмила Левицкаял. Хъирив махъ лавхъунни ДР-лул Культуралул министерствалучIасса дуккаврил ва методикалул центрданул директор Калимат Элдаровал.
ЧIава скрипачтурал гьунардан кьимат бишлай бия Дагъусттаннал паччахIлугърал филармониялул камерный оркестрданул каялувчи Зарифа Аьбдуллаева бакIчисса жюри. Конкурс хьунни оьрмулул личIи-личIисса шиннардил оьрчIал дянив 6 номинациялий. ХьхьичIунсса кIанттурду бувгьунни С. Агъабабовлул цIанийсса музыкалул школалул ва гьунар бусса оьрчIансса М. Къажлаевлул искусствалул школалул оьрчIал.
Ахирданий шагьрулул Культуралул, спортрал ва жагьилтурал политикалул иширттал управлениялул начальник Мурад МахIаммадовлул барчаллагь увкунни конкурсравух гьуртту хьуминнахь ва жюрилухь, шагьрулул администрациялул чулухасса грамота дуллунни Зарифа Аьбдуллаеван.
