[dropcap]О[/dropcap]ьрчIру Ватан ххирану, нитти-буттал, хъуна-чIи­винал хIурмат буну тарбия бавриву хъуннасса даву дачин дурну буссар Николаевлул цIанийсса кIичIиравусса шагьрулул 2-мур биб­лиотекалул пишакарталгу. Билаятрал агьамсса иширттан, хъуни­сса байраннан хасъсса шадлугъру дакъасса, вайннал шикку дувай­ссар тIабиаьтран, бугьарасса халкьуннан, машгьурсса шаэртуран, чичултран ва цаймигу иширттан хасъсса шадлугъру.
З. АьбдурахIманова
[dropcap]В[/dropcap]ана уттигъанну, ва зурул байбихьулий, декабрьданул 3-нний билаятрай кIицI лагайсса Аьрасатнал КIукъакIулсса СаллатIнал кьинилун хасну шиву дяъвирдай жанну дуллуминнал аьпалунсса батIаву хьунни. Ванивух гьурттуну бия чIаравсса 37-мур школа-гимназиялул, 5-мур лицейрал дуклаки оьрчIру ва ДГПУ-лул студентъталгу.
БатIаврил «Караматсса цIарду!» тIисса цIанилусса кIилчинмур бутIа хас бувну бия гьар шинах билаятрай декабрьданул 9-нний кIицI лагайсса Ватандалул Вирттаврал кьинилун.
Дайдихьу хьуна библиотекалул луттирду буккаймур залдануву «О подвигах, о доблести, о славе» тIисса луттирал выставкалул презентациялия. ОьрчIащалсса ихтилатраву библиотекалул пишакартурал бувсуна махъ шиннардий хьусса дяъвирдаву дагъусттанлувтурал дурсса чувшивур­ттая ва ба-бакI гьарца виричуная. Шикку дакIнийн дирчуна Аьрасатнал Вирттаврал цIарду хIалал дурсса Исяев Мутайл, Оьмаров МахIаммадлул, АьбдурахIимов МахIаммадшамиллул, Загьидов Загьидлул, Мурачуев Халидлул ва цайминнал цIардугу.
Аьрали Славалул кьинилун хасъсса шамилчинмур бутIуву дук­лаки оьрчIахь ва студентътурахь бувсуна Аьрасатнал авадансса тарихравасса цаппара иширттая. Хаснува бувсуна дяъвилул шиннардий блокада диркIсса ппур­ттуву Ленинградуллал халкьуннал бакIрачIан бувкIмуния, Сталинград душмантурацIа мурахас буллалисса хъуннасса талатаврия, Аьрасатнал аьвзалзаманнавасса Чудскаллал бярав хьусса талатавриягу.
ОьрчIалгу шикку цала чулуха­сса гьурттушиндараву Ватандалун, Вирттаврал чувшивурттан хасъсса назмурду дурккуна.