ТIабиаьтраяр хьхьичIун къабукланну

Цукунсса хьунавав МахIач­къаллив гьашинусса кIи? Атилшиву гьарзасса ягу думур кьакьан дувайсса марчру гьарзасса ? Гъилисса ягу дякъил замгьарду бивщусса?


З.АьбдурахIманова
[dropcap]К[/dropcap]Iинтнил цалчинсса зурул байбихьулий хъун шагьрулий яхъанахъисса жунма гьарнан вай суаллансса жавабру бивнуччан дикIай, жуцIунма жула оьрчIалгу ялун нанисса ЦIусса шинал байрандалийн марххала банхьуви тIисса умуд бишай.
Щилнияргу хъинну вай суаллан жаваб дулунссар гьавалул дахханашивурттал хъирив бавцIусса пишакартал-синоптиктурал. Вайннал бусаврийну, гьашинусса декабрь хьхьичIми шиннардих бурувгун гъилисса бикIантIий бур. ЦIусса шинал байрангу жува марххала бакъанма хьунадакьинтIий бур. Метериологтурал укун­сса кIинтнил дайдихьулул хIа­къираву гьашинусса инт лахъи ларгшиву ва цила багьайкун­сса гъилишиву жучIара июньдалул ахирданий дагьшиврул хIучча буцлай бур. Ванийн бувну, гьашинусса сентябрь барзгу, гъинтнил барз кунма, кIирисса бия. Хъирив октябрь барзгу хьхьичIми шиннардих бурувгун 4-5 градусрал гъилисса хьуну бур , ноябрьгу вава куццуй -3-4 градусрал. Ялув кIицI бувсса ку­ццуй, декабрьданийгу хъуннасса дахханашиву хьунтIий чIалай дакъар.
Синоптиктурал бусаврийну, цила багьайкунсса дяркъу жучIара хьунтIий дусса дур январьданул ахирданий, цивгу февральданул дянийннин лахъи лагантIисса. Гьашину­сса кIи дикIантIий дусса дур хъунмурчIин марчру гьарза­сса, чIяру гъараллу, марххалтту бакъасса. Хьхьирил щинал температура дикIантIий дур дянивну ва чIумун лархьхьуну- 6-7 градусрал гъилисса.
Цукунсса кIи ягу гъи хьун­тIиссарив 100 % ччянива дакI дарцIуну аьлимтуращагу бусан къашайссар. Укунсса хIасиллу пишакартурал дувай­ссар хьхьичIми шиннардил тапаватшивуртту ххал диргьуну.
Мунияту жувагу умуд бишинну хъинмунийн. КIинттулсса гъилишивунияр тIабиаьтран марххалагу, атилшивугу, дя­къил замгьаргу ацIлий хъинссар. Инттухунмай мурхьру тIутIавун бахьлавгни микIлачIру, марххаланияр бургъилмур биялагу.
Мунияту жувагу умуд биширча бакъа, тIабиаьтраяр хьхьичIун къабукланну .