Ттучанну ккуччу тIий був­цIусса бахшиширттал, майданнай бацIан бувсса чIюлу бувсса елкардал буслай бур ЦIу­сса шин гъанну душиву. Инсанталгу, ялун нанисса байрандалийн хIадур хъанай, чялиш бувккун бур.Цуксса кьурчIи бизанссар ва ппурттуву жува, шяра диллай, хъугьу тIий байбиширча. Къахъина къашай хьуну ЦIусса шинал бухкIуллий, учайхха «цукун хьунадаркьурив ЦIусса шин, мукунна щалла шингу лагайссар» куну. Цири бан аьркинсса вай гьантрай къашай къахьун.

— ХьхьичIва-хьхьичI, хIачI­лачIияра гъилисса, кIирисса чяйрду, урттул ва хIаллил ахъулссаннул щинну (настой, отвар).
-май щинал нарча, гъили­сса щинай (щаращисса щинавун цIил къеп бивчуну) ягу календулалул щинай вилаглан аьркин­ссар (дачIи литIра щинавун ца чяйлул къуса настойкалул).
— алоэлул щинащал ххя­ххиялул аьгъушиву хIала дурну (1:1), кIи-кIива кIунтI майравун бутIин аьркинссар.
-уттубишин хьхьичI ччанну бишин аьркинссар горчица дирчусса щинаву, 10 минутIрайсса.
-ххуйну кумаг байссар, майрайн массаж барчагу.

Кьакьари цIий, хъугьу тIий байбиширча:
-хъинссар солодкалул мархха щаращи бувсса щин ягу неххал чIапIул щин хIачIларча. Ххуйну кумаг байссар, ницIахун суврарал настой хIачIларчагу.
-2 ссятрай цал кьакьари вилаглан аьркинссар содалул щинай, кIяла тIутIул щинай, календулалул щинай.
-ишла бувара тIабиаьтрал антибиотикругу – гьарца кьини кIира ккарччи лаччул ва дянивсса чимусул бакI. Вайннулла ингаляциягу хъинссар.
-чан дувара кофе, хIан, пIапI­рус учаву, кьакьари цIу­цIий­ни, кIирисса ва аьнтсса дуки-хIачIиягу арх дувара.

Буруччинсса маслихIатру:
-гьарца кьини кIюрххил дувара зарядка
-бюхъавай бахьтта заназияра.
-мазанарду инсантал бавтI­сса кIанттурдайн, агарда чара ба­къасса иш бухьурча, лаххияра, нач къадурну, маска.
-канакияра А,С,Е витаминну гьарзасса дукия – лимонну, мандаринну, апельсинну, цIил бувсса калан. Столданий мудан дикIан аьркинссар ахънилсса, накI ва накIлил продукты.
-Янна лаххияра гьавалул тагьарданух бурувгун. ДакIний битияра зунна цIуллуну-сагъну, ххарину, ххуйну хъинсса дустуращал тяхъасса компаниялий хьунадакьин аьркиншиву ЦIусса 2018 шин.
Зун цинявннан цIуллушиву чIа тIисса Т. ХIажиева