Кьини кьинилул лагъри

Декабрь зурул 3-нний Каспийск шагьрулий хьунни Аьрасатнал чемпионатрал ирглийсса тIуркIу. «Ска-Хабаровск» командалущал ччалли дурккунни МахIачкъалаллал «Анжи» команда.

Руслан Къардашов
Футболданул майданнив хьунабавкьунни Аьрасатнал чемпионатрал сияхIрал 15-мур ва 16-мур ххуттардийсса командартту.
ТIуркIулул 55 секунд гьа хьунни «Анжи» командалун цалчинмур гол бакьин. Гьужумчи Лесканол цачIанма Маркеловлул гьан бувсса ттуп муттаэтурал къапучинал чIарах бивщуну, бавкьунни «Ска-Хабаровск» командалул къапулувун. Сивсусса дайдихьу щала даврил дачIирхха. Мяйра минутIрава Полуяхтовлул му­ттаэтурал штрафнойлуву бирив­сса ттуп запI бикIан бунни «Ска-Хабаровск» командалул къапулувун. Кьини кьинилул лагъри, ва кьинигу жула талихIрансса хьуну дия. ТIуркIулул 27-мур минутIрай «Ска-Хабаровск» командалул къапучи Криворучко судьянал футболданул майдандалия уккан увунни. Ванал цащала данди увксса «Анжилул» гьужумчи Лескано, ччаннавун тIанкI увкуну, бакIракъутталий увтунни. ТIуркIулул цалчинмур бутIа къуртал хьуннин «Анжи» командалул бавкьунни ялагу ца гол.
КIилчинмур таймрай командарттал тIуркIулул хъит тIутIавуртту чан дунни. «Анжи» командалул гол бакьинсса каширду чансса дакъая, 4-мур гол бавкьунни тIуркIулул дайлитIу хьун 5 минутI лирчIсса чIумал. Ахиргу тIуркIу 4:0 счетрайну къуртал хьунни.
«Анжи» — «Ска-Хабаровск – 4:0
Голлу: Лескано (1), Полуяхтов (8), Маркелов(43), Армаш (85).
«Анжи»: Лория, Полуяхтов, Самарджич, Брызгалов, Армаш (Яковлев, 89), Хубулов (Эльмурзаев, 89), Бакаев, Тетрашвили, Данченко (Иванченко, 78), Лескано, (Маркело).
«Ска-Хабаровск»: Криворучко, Пушко (Эдиев,22) Димидко, Баляйкин (Довбня, 31), Черевко, Савичев, Кялинский, Наваловский, Федотов, Маркович (Христов, 52), Никирофоров.

Пресс-конференциялий «Анжи» командалул хъунама тренер Вадим Скрипченкол увкунни:
— «Анжи» команда лайкьссия хIакьину ххувшаву ласун. Жул гьужумрал тIуркIулул, дайдихьулийва бавкьусса голлал кумаг бунни багьайсса ххуллу ласун. Муттаэтурал командалуву 10 футболист ливчIукун, жу хIарачат буллай буссияв ххувшаву жула канища дуккан къаритан.
«Анжи» командалул хъиривмур тIуркIу хьунтIиссар Каспийскалий Москавуллал «Динамо» командалущал декабрьданул 9-нний.