Декабрьданул 19-нний Ма­хIачкъалаливсса «Единая Россия» партиялул председатель Дмитрий Медведевлул приемныйлуву агьали кьамул бунни Аьрасатнал ПаччахIлугърал Думалул Федерал Мажлисрал депутат Аьвдулмажид МахIрамовлул.

Имара Саидова
Депутатнал цалчин кьамул бувсса Къизлардал шагьрулиясса Камилат Сулайманова бия цIуллу-сагъшиврул ссуссукьушиву дусса группа буван кумаг баву тIалав буллай. Ванил бувсунни, цуппа захIматсса азарданул бувгьуну бушиврийн бувну, льготарду думиннан булай­сса сияхIрайсса ххирасса даруртту машан ласун багьлай бушиву. Сулаймановал бусаврийн бувну, Къизлардал шагьрулул азарханалул ванин мушакъатшиву дусса группа ласунсса комиссиялийн­сса тIайла буккаврил чагъар къабуллай бусса бур. Депутатнал, Республикалул цIуллу-сагъшиву дуруччаврил министрнайн оьвкуну, Камилат Сулайманова цинма багьайсса кумаграл хъирив гьан бунни хъин баврил отделданул хъунаманачIан.
МахIачкъалалиясса ХIа­жи Рамазанов кIилчинни укI­лакIисса депутатначIан, квота анавар дуккан дан кумаг бува тIий. ХьхьичIвагу ва увкIун ия республикалул кьатIув хъин хьунсса направление ласун. Утти тIурчан, ванан квоталийхчIин операция баву анавар буккан бан багьлай бур. МахIрамовлул цала кумагчинайн тапшур бунни, Республикалул цIуллу-сагъшиву дуруччаврил министр Танка ИбрагьимовлуйхчIин, А.В. Вишневскийл цIанийсса хирургиялул институтравунсса квота анавар дуккан дуван.
Мукунма депутатначIан бувкIсса агьалинал масъалар­тту бия ххуллурду бакьин баврил, газрах ва цаймигу коммунал хIаллихшиннардах буржру ялун биян буллалаврил хIакъиравусса. МахIрамовлул махъ буллунни цинявппа агьалинал сукку був­сса масъалартту цала аякьалийн ласун.