[dropcap]Л[/dropcap]авгсса бигьалагай гьантрай МахIачкъалаллал администрациялучIасса Хъаннил советрал сакиншиндарай Мушакъатсса халкьуннал кьинилун хасъсса акция хьунни. Ванивух гьуртту хьунни Дагъусттаннал хъаннил советрал хъунмур Интизар Мамутаева, шагьрулул хъаннил советрал хъунмурну зузисса 13-мур школалул директор Муъминат Муртазаева ва цаймигу.
З. АьбдурахIманова
Акциялул мурад бия, мушакъатсса оьрчIру тарбия буллалисса ужагъирттайн бивну, шаймунил кумаг бувансса. Чирилул акциялул лагрулий ва кьини сакиншинначитал умудрай бия 15 кулпатравун биян.
Гьарца кулпат – жяматрал ца къалипри. Хаснува къашавайсса оьрчI яхъанахъисса кулпат жула гьарнал кумаграх, цIимилул мукъух мюхтажну бикIайссар. Мушакъатсса оьрчIал нину-ппу хъинну захIматсса, кIусса гьиву цайра ларсун нанисса, жяматралгу, хIукуматралгу аякьа дан багьлагьисса халкьри.
Ва чирилул давривух мукунма гъирарай гьуртту хьунни «Эконом» машлул къаттагу. Гьарца кулпатран вайннал пишкаш дурунни бахшишру ласунсса сертификатру.
Акциялул сакиншиндарал вакилтуращал хьусса ихтилатирттаву мушакъатсса оьрчIал нитти-буттахъал кIицI лаглай бия гьар кьинисса цала къайгъурдая, оьрчIан аьркин хъанахъисса дарурттая, ми чун-бунугу буккан байни хьунадакьайсса захIматшивурттая ва масъаларттая. Хъамаллуралгу цив мудангу аьркинсса ишираву, кумаг аьркинний, чIарав бацIан хIадурну бусса бувсунни.
