[dropcap]В[/dropcap]ай гьантрай ДР-лул Роспотребнадзорданул Управлениялул идаралий шадлугърал даражалий тIиртIунни СССР-данул лайкь хьусса хIакин, чIярусса шиннардий Республикалул санэпидстанциялул хъунама хIакинну зий ивкIсса МахIаммад-ТIагьир Лагиевлул аьпа абад буллалисса мармарчарил ула.

Имара Саидова
Дагъусттаннал тарихраву цалчинни тIиртIусса ххишала акъа ххаллилсса, цала даву ларайну кIулсса, республикалий санитариялул ва эпидемиологиялул къуллугъ сакин бувсса, мунил даву сантирайн руртсса санитариялул хъунама хIакиннал аьпа абад буллалисса мармарчарил ула. МахIаммад-ТIагьир Лагиевлул аьпа абад буллалисса даву хьунни Республикалул санитариялул 95 шин шаврин хас дурну. Ши­кку гьуртту хьунни Республикалул Роспотребнадзорданул каялувчи Элеонора Оьмариева, ванил зузалт ва МахIаммад-ТIагьир Лагиевлул гъан-маччами.
Элеонора Оьмариевал цила ихтилатраву кIицI лавгунни 20-нния лирчусса шиннардий санитариялул хъунама хIакинну зий МахIаммад-ТIагьир Лагиев рес­публикалунгу, агьалинангу бусравну ивкIшиву.
— Ттун хIакьинусса кьинигу дакIний бур Лагиевлул даврицIухсса низам, кьянкьасса тIалавшиннарду, тIайласса хIукмурду. Лагиев зузисса шиннардий тамансса хьхьичIуннайшивуртту хьуссар. Мунаща бювхъуна инфекциялул азарду дусса къашайшалт чан буван, база цIакь буван. Ванал хIарачатрайну бувссар Къизлардайсса, МахIачкъалаливсса, Дарбантливсса, Буйнакскалийсса ва республикалул 12 цаймигу райондалийсса санэпидстанциялул идарартту. Ванал дурсса давур­ттан бивщусса лавайсса кьиматнугу хъанахъиссар агьалинал санитариялул ва эпидемиологиялул ахIвал-хIал ххуй баву, — увкунни Оьмариевал.
Ва ххаллилсса даврил сиптачитал хьуминнахь барчаллагь увкунни Лагиевлул ссил.
— ХIакьинусса кьини ттул оьр­мулуву дур ххарисса ва пашмансса асарду хIала бувхсса. Ххарину бура, ттула уссил аьпа абад буллай, санэпидстанциялул коллективрал дурсса даврия.
Управлениялул аллеялий бувгьунни мурхьру. Мероприятиелул ахирданий Управлениялул актовый залдануву ккаккан дунни хIакиннал оьрмулия ва даврия бусласисса видеосурат.