Дагъусттаннал стандарти­зациялул юбилей

ПаччахIлугърал Регионал стандартизациялул, метрологиялул ва ххал бигьавурттал центрданий (ФБУ «Дагестанский ЦСМ») хьунни ва идаралун 90 шин хъанахъисса юбилейран хасъсса шадлугъ.

З. АьбдурахIманова
Шадлугъ тIитIлай, центрданул каялувчи Зайирбаг ХIажиевлул, пишакартал барчагу бувну, кIицI лавгунни ва аралуву зузиминнал даврил агьамшиву чIирисса дакъашиву.
Ванал бусаврийну, идаралул лабораториярттал ва производствалул къатрал дусса дур 1200 кв.м. Вайннайн багьайсса бур Дарбант­ливсса ва Къизлардай­сса кIива филиал ва ххюва лаборатория.
Мукунма ванал кIицI лавгунни центр зий бушиву ххюазарунниха ливчусса респуб­ликалул предприятияр­ттащал ва организациярттащал. Миннувух бусса бур «М. ХIажиевлул цIанийсса Завод» АО, «Концерн КЭМЗ» ОАО, «Авиаагрегат» ОАО, «Дагдизель» ОАО, «Каспийский завод точной механики» ОАО, «Завод стекловолокна» ОАО, «Дербентский коньячный завод» АО, «Кизлярский коньячный завод» ФГУП, «Газпром трансгаз Махачкала» ООО ва цаймигу.
Центрданул тарихгу къачIивисса бур. Респуб­ликалул архивраву яхьуну бусса бур Владикавказрай бивкIсса цинциллал ва дуциндарал палаталул отделение МахIачкъалалив 1927 шинал тIивтIушиву тасттикь бувсса чагъар. Отделение тIивтIуну бур ДАССР-данул Халкьуннал Мажлисрал комиссартурал хIукмулийну. 1954 шинал идаралийн «Дагестанская госконтрольная лаборатория по измерительной технике» тIисса цIа дирзун дур. Яла махъ ванийн дирзун дур, цIанагу учайсса, «Дагестанский центр стандартизации и метрологии» тIисса цIа. ХIакьинусса кьини центрданий зий усса ур ряхцIалунничIан ивсса инсан.