Москавлив, Дагъусттаннал Постпредствалий, хьунни Совет Союзрал Виричу Муса Маннаров аьламравун левххун 30 шин шаврил шадлугъ. 1987 шинал декабрь зурул 21-нний, командир Владимир Титовлущал ва космонавт-исследователь Анатолий Левченкощал, лакрал миллатрал язисса арс «Союз ТМ – 4» космосрал жамилий, «Байконур» космодромрая гьаз хьуссия аьламравун.

П. Рамазанова
[dropcap]В[/dropcap]айннал экипаж шамийлла бувкссия тIивтIусса аьламравун. Яла лахъимур хIисаврай (365 гьантта ва 22 ссят дурссия) полёт дагьссия Гиннесслул рекордирттал луттирайн.
Муса Маннаровлул гьунарданун 30 шинавагу лайкьсса кьимат бишлашисса ва мунахьгу, гьалмахтурахьгу барчаллагьрал махъру учинсса шадлугъгу хIадур дурну дия Москавуллал «Дагъусттан» Культуралул центрданул, Постпредствалул уртакьшиврийну.
Бусравсса хъамаллуравух бия машгьурсса археолог, РАН-далул член-корреспондент Рауф Мунчаев, ПаччахIлугърал Думалул депутат Аьбдулмажид МахIрамов, Аьрасатнал Жяматийсса палаталул член Айгун МахIаммадов, летчик-испытатель, Совет Союзрал Виричу МахIаммад Толбоев ва цаймигу къуллугъчитал, жяматий­сса ишккаккулт, элмулул ва культуралул вакилтал, Дагъусттаннал агьалинал оьрмулул иширттавух мудангу чялишну хIала буххай­сса патриотътал.
Язисса хъамаличу, «Союз ТМ-4» жамилул командир Владимир Титовлулгу шадлугърал сий гьаз дуруна. Дагъусттаннал Постпреднал цалчинма хъиривчу ХIамзат ХIамзатовлул цалва ихтилатраву кIицI лавгуна Муса Маннаров космосравун леххаву Дагъусттаннал агьали пахрулувун бутансса иш хьушиву. Москавливсса Дагъусттаннал Культуралул центрданул президент Арсен ХIусайновлул кIицI лавгуна захIмат- жапа­сса космосрал элмулуву дурсса хьхьичIуннайшивурттахлу Муса Маннаровлул ва мунал уртакьтурал Дагъусттаннал, Аьрасатнал ва СССР-данул сий бюхттулсса даражалийн гьаз дуршиву. Ванал Муса Маннаровлун ва Владимир Титовлун дуллуна Культуралул центрданул цIаниятусса «За верность Дагестану» тIисса медаль ва барчаллагьрал ча­гъарду.
Владимир Титовлул бувсуна цанма тIайлабацIу хьушиву Муса Маннаров кунасса, гьунар бусса, даву куртIну кIулсса ва, захIматсса иширахун багьукун, хъярчругу буллай, цIакьну ацIайсса бортинженернащал космос ахттар буллан.
Муса Маннаровлул оьрмулия ва давурттая бусласисса суратирттал выставкагу хIадур дурну дия Постпредствалул. Ва кьини хъунасса космонавт лахъа-хъун уван бавтIцири, барчаллагьрайсса ихтилатру буллай, чIурчIав дуллай бия Муса Маннаров, гьунар бусса, итххявхсса ушаврицIун, пахру-ххара ба­къасса, хьхьичIун урувгсса, аслий­сса зунтталчугу ушиву.