Хъамакъабитансса лахIзарду

Ноябрь зурул 28-нний Оьруснал театрдануву лакрал миллат­рал культура бюхттулну ва кьиматрай душаврил барашин дуллалисса байранну хьунни, Дагъусттаннал цинявппагу миллатирттан ххира хьусса, гьунар ххишаласса композитор Мазагьиб Шариповлул юбилейран хас дурсса концерт.

Имара Саидова
Мазагьиб Шариповлул балайрдах мякь бувккун бивкIсса инсантурал , щапI куну ацIансса кIану бакъа бувцIуну бия зал, кIанттурду бакъамигу, кIу къабивзун, концерт къуртал хьуннин бавцIуну ххал дуллай бия. Оьрмулул бугьараминная тIайла хьуну, жагьилсса инсантурал щап куну бувцIусса зал къаккавккун ттул хъунмасса хIалъя. Гукунсса зал батIаврил исват буллай бия цIанихсса композиторнал творчество тIалавну душиву.

Концерт буниялагу ларайсса даражалийсса хьунни. Шариповлул макьаннах, халкьуннал балайрдах ххуцI хьуну бивкIсса инсантал бия, аслийсса лакку балайрдал кьимат бусса, нукIувасса замана хьхьичI бавцIунни, бигьалавгунну тIий.
АьФ-лул культуралул лайкь хьусса зузала, ДР-лул искусствалул лайкь хьусса ишккакку, «Дагъусттаннал вирдакI» тIисса Дагъусттаннал ПаччахIлугърал премиялул лауреат Мазагьиб Шариповлул музыкалул творчествалуха зузисса 60-нния лирчусса шиннардий чивчусса балайрдал Дагъусттаннал магьирлугъ хьхьичIуннай ва авадан дурссар. Композиторнал творчествалунсса яла бюхттулмур кьиматнугу хьуссар, хIакьинусса кьинигу республикалул циняв­ппагу мазурдий ванал макьаннайсса балайрду тIийнма бушиву.

Мазагьиб Шариповлул творчествалун ва оьрмулул юбилейран хас бувсса мажлис хIадур бувну бия ДР-лул культуралул министерствалул ва ДР-лул халкьуннал творчествалул къатлул.
Концерт дайдишин хьхьичI сахIналий ккаккан дуллай дия Мазагьиблул оьрмулия ва творчествалия бусласи­сса видео.
Шариповлул юбилей барча дуллалисса ва мунал творчествалун лавайсса кьимат бишлашисса ихтилат бувна ДР-лул культуралул министр Зарема Буттаевал.
— Вил музыкалул гьунар бур щихакIуй къалавхьхьусса ва ляличIину итххявхсса. Музыкалул чулухунмайсса гьунарданул, цикссагу шиннардий инара дуллалисса даврийн хаин къашаврил ва бувсса хъунмасса захIматрал лайкь бувссар ина вила чулухунмайсса хIурмат ва кьимат. Вил творчествалул агьамми ва кьиматрайми ххуллурдуну хъанахъиссар Гъумучиял шяраву музыкалул школа тIитIаву, цIу-цIусса балайчитал аьлтту буллай ва фольклорданул коллективирдай каялувшиву дуллай бувсса захIматру. ЛичIинува кIицI лаган ччай бура ина композиторшиврул ххуллий бивхьусса хъунмасса захIмат. Дагъусттаннал халкьуннал аслийсса культура ва творчества ядавриву ва хьхьичIуннай давриву бивхьусса захIматрахлу гьашину Мазагьиб Шарипов лайкь хьуссар «Душа Дагестана» тIисса паччахIлугърал премиялунгу.
ЧIа тIий бура вин цIуллушиву ва творчествалуха зунсса гъира-шавкь, — увкунни Зарема Бу­ттаевал.
Мазагьиб Шарипов юбилейращал барча ан бувкIун бия ЦIуссалакрал райондалул бакIчинал хъиривчу ХIажи ХIажиев, Лакрал райондалул КIулшивуртту дулаврил управлениялул хъунама Явсупа ХIажиев, Хъусращиял шяраваллил бакIчи Эдуард ХIажиев ва чIявусса цаймигу композиторнал творчество ххирасса инсантал.
Мазагьиб Шариповлул бусравну бувтсса оьрмулун ва чIярусса шиннардий дакIнихтуну бувсса захIматран лайкьсса кьимат бишлашисса ихтилат бунни МахIачкъала шагьрулул культуралул профсоюзирттал комитетрал председатель Марзижат Буттаевал.
Барча бавуртту, ихтилатру бувну махъ сахIналий бувккунни Лакрал, Ккуллал ва ЦIуссалакрал районнал машгьурсса фольклорданул ансамбльлу. Хъирив дайдирхьунни Республикалул ПаччахIлугърал халкьуннал инструментирттал оркестрданухун балайрду тIутIисса ххаллилсса концерт.
Муданма кунма дакIнивун гьавас бутансса, ххарисса асарду биян бансса балайрду увкунни Дагъусттаннал Халкьуннал артист МухIсин Камаловлул, Да­гъусттаннал лайкь хьусса артист Арслан Шагьмардановлул.
Тамашачитурангу, композиторнангу ххаллилсса бахшишну хьунни хъунмасса хIаллай сахIналийн къабуклай бивкIсса цIанихсса балайчи ПатIимат Аьлие­ва. Халкь мунил балайрдах мякь бувккун бушиву чIалай бия, му сахIналия гьан къабитлай, хъатру ришлай цIунилгу балайрду тIутIи баврийну. Тамашачитурал мукуна ххуйну кьамул унни Ильяс МахIаммадовгу.
Цинявппагу ва концертрай гьуртту хьусса артистътал бия цаннаяр ца гьунар бусса. Шагьалай МахIаммадова, Нурианна Къаллаева, ХIабибат Буттаева, Марианна МахIаммадова. Ххуйъя вайннал балайрдугу, мажлисрацIун даркьусса лаххиярттугу.
Гьай-гьай, концертрал сий хъиннура гьаз дунни Дагъус­ттаннал Халкьуннал артистка Лариса ХIажиевал. НукIува инсантуран ххира хьуну бивкIсса МахIаммадзагьид Аминовлул, Мирза МахIаммадовлул мукъур­ттийсса Лариса ХIажиевал ххаллилсса балайрду ляличIинува асар хьунни тамашачитуран.
Ва концертрал буниялагу исват буллай бия Марияннулгу, Мирханумлулгу цIа ларсун нанисса даражалийсса балайчитал жулва бушиву.
Залданувугу лак бакъасса, цайми миллатирттал инсанталгу бия. ЧIалай бия Дагъусттан­нал миллатирттачIагу лакрал макьанну, балайрду ххирану бушиву. Концертрай балай увкунни Мазагьиб Шариповлул ученик, ляличIисса чIунил ва такьвалул заллу, яруссаннал балайчи МахIаммадтамир Синдикьовлул.
ДакI ххари хъанай дия аслийсса лакку макьанну дагьан дурну тIутIисса ялун нанисса жагьилсса балайчитурацIа. Цинявппа хIайран бунни цIанихсса балайчи Карин Кьадинаевлул душнил Дианал.
Шиккува кIицI къалавгун къабучIир, утти­сса замана интернетрал каши, бияла хъунмасса бусса бушиву. СахIналийн бувксса балайчитурал балайрду тIайланнасса эфирданувух ккаклай, буруглай бия концертрайн бучIан къабювхъумигу. ХIасил, тай балайрду бия тиччава машгьур хъанай.
Концертрайн бувкIцири бия Мазагьиблуя ва Мирханумлуя легендарттая кунма гъалгъа тIий. ХIайп тIийнма ливчIунни Мирханум сахIналийн къабу­ккаву.