«Жул мурад – гьарца къатлуву чани чан къашавур»

Ккуллал райондалийсса шяраваллу чаннал дузал даврил ялув дарцIусса идарану хъанай дур «Кулинский сетевой участок». На уттигъанну вайнначIан лавгссияв,Ккуллал райондалийсса шяраваллавун чани дузал баврил иш-тагьар цукун дурив цIуххаву дуван. КIибачIлай ура зухьгу сетьрал участокрал хъунама Шамххалов Серегиннул бувсмур.


— Шикку зий ттул хьунни 18 шин. ЖучIанма Ккуллал райондалийсса подстанциялийн чани най буссар Гергебиллал электростанциялия. Мукунма чани дузал къахъанахъийни, ишла бувайссар Агъуллал райондалул чулуха нанисса чанигу. Яла захIматшивуртту дикIай кIинтнил чIумал. Му чIумал подстанциялийн, ххаллайн гуж багьлан бикIай. Жунма кIулсса кьяйда, махъсса шиннардий такса инсантал, идарарттаву зузисса зузалт ишла буллай бур къатта-къуш гъили буван ттукIрай ла­хъайсса батареяртту. Мунияту жу, кIинттулнин хIадур хъанай, дакьин дуварду ЧIяйннал шярава Къянив дияннин нанисса линия. Ванил лахъишиву дур 26 км. Шикку баххана барду аьв­сса 26 ттала, 5 пасенка, 10-нния лирчусса изоляторду, 300 метра ххаллал. Амма марххала бувну, дяркъу шаврийн бувну, ххаллу чансса дакъа даххана дуван къархьунни. ЛирчIми давуртту инттухуннай дантIиссар. ЧIун хьуну дур, бух шаврийн бувну, подстанциялийсса 4МВА бу­сса трансформатор баххана бувну, ванин кIанай 6МВА-лулсса бишин. Инттухуннай Вихьуллал шяравусса ттукIрал ххаллу даххана дантIиссар пландалийн бувну. КIикку цакьнира диркIминнуяр ганзсса ххаллу дишинтIиссар. Мукунсса тIалавшинна дур техникалул инженертурал чулуха.

— Райондалий зузисса, вила канилусса зузалт­рая ци учин бюхъан­ссар?
— Циняв шикку зузисса зузалт бур 20 инсан. Ми циняв­ппагу чIярусса шиннардий зузи­сса цала даву хъинну ххуйну дувайсса пишакарталли. Электротокрайн дархIусса даву, жунна кIулли, мугъаятну дан багьлагьисса даву дикIайшиву. Цинявннал цIарду кIицI къадарчагу, кIицI дуван ччива цаппара­ссаннал цIарду: Исяев Абакар, ванал зий 43 шин хьуну дур. В ур электромонтертурал бригадир. ХIасанов Руслан, ванал зий 21 шин хьуну дур. Ва ур шофер-электромонтер. Шамххалов Рамазан, ва ур участокрал мастер. Шикку зий ванал 33 шин хьуну дур. Алхасов Шамххалалгу чIярусса шинну дурссар шикку зий. Ва ур электросчетчикирттал ялув авцIусса пишакар. Барххуев ХIусбан зий ур подстанциялул дежурнайну. Зий хьуну дур 25 шин. Мукунна кIицI дуван ччива цалла даву дакIнихтуну ххира­сса, жагьилсса пишакар ухьурчагу, Маммаев Аздардул цIа . Аздар зий ур анаварсса иширайну давурттив дуван багьлагьисса бригадалуву. Бур цаймигу ххуйну зузисса зузалт.

— Серегин, жула шяраваллаву та чIумал кунма электромонтертал ба­къар. Ва иширал ялув вища ци бусан хьун­ссар?
— Га чIумал чани инсантурачIан биян баву хьуннав, гай бувцу­сса ххаллу дакьин даву хьуннав хIукуматрал канихь дия. Мунияту га чIумал гьарца шяраву икIайссия чаннал ялув авцIусса электромонтер. Утти гьарзат акционертурал канихь дур. Ми бур гьарца задирттал заллухъру. Мунияту жул уставрай чивчуну бур жу жаваб дулайшиву таксса инсаннал, идаралул циксса чани ччувччуну бурив хIисавравун ласайсса счетчикрачIан бияннин. Гания гихунмай инсаннал цала дузал буван багьлай бур чаннацIун бавхIусса масъалартту. Шиккува кIицI буван, вай инсантурал къатравусса чани бакьин баву хъар хъанай дуссар шяраваллал администрациярттайн. Амма миннал, цал бюджетраву арцу да­къар тIий, электромонтертал бугьлай бакъар. Мукун бухьурчагу, жу жучIана увкIсса, оьвку­сса угьарасса инсаннан кумаг къабувну къабитару.

— Ци учин ччива вин жула райондалул жяматрахь?
— Циняв жула инсантал хъанахъиссар жущалсса чаннал зузалтрал хIаласултну. Циван учирча, чани ишла къабайсса инсан утти акъа тIий. Ва декабрьданул 22-нний хъанахъисса байрандалул кьини жула цинявннал байранни. На барча буллай ура ттула чулуха ва циняв чаннал ялув бавцIусса зузалтрал чулуха Ккуллал райондалул жямат. Мукунна чIал къархьуну жула ялун най дур ЦIусса 2018-ку шин. Барча тIий ура цинявппагу лакрахь ЦIусса шингу. ЧIа тIий ура цIуллушиву, дуланмагъ щаллушиву. Жул мурад – цинявннал къат­раву чани бушивур.