Уттигъанну Каспийскалий Аьрасатнал Халкьуннал аслийсса культуралул центрданий хьунни «Терроризм – зло против человечества» цIанилусса батIаву. Му тIиртIунни Центрданул директор, жулва лакку душ Башикар Вагьабовал.

Бадрижамал Аьлиева
Уттизаманнул ца яла хъунмамур балаллуцIун бавхIусса масъалартту ххал бигьлагьисса батIаврий гьур­тту хьунни шагьрулул бакIчиначIасса Жяматийсса палаталул председатель Гульнара Салимханова, килисалул къуллугъчи отец Иоанн, ДР-лул Муфтиятрал Каспийскалий­сса просвещениялул отделданул каялувчи АхIмад Бабаев, шагьрулул 1-мур школалул директор Фарида Аьлиева, Машиностроениялул ва сервисрал колледжрал студентътал ва чIявусса цаймигу.
Ихтилатру хьунни Каспийскалий ва Аьрасатнал цаймигу шагьрурдай хьусса хъунисса теракттирдая, ккаккан бунни Лениннул кучалийсса чIярузивурду дусса 58-мур къатта пIякь учин бувну бивкIсса кIанттаясса документал кадрарду. Шагьрулул 6-мур школалул дуклаки оьрчIал ккаккан дунни литературалул композиция.
Ихтилатру бунни отец Иоаннул ва АхIмад Бабаевлул. ХIакьинусса тагьардания, ислам диндалул бугьлагьисса кIанттуя ихтилат буллай, А. Бабаевлул кIицI лавгунни обществалул цIанасса ца хъунма бала бушиву диндалул гьанурду къакIулшиву, дукъаккаву, оьвчаву дунни жагьилтурайн лахьлан цалла дин, цанчирча му дин къаччиминнал хIакьину хьхьичIра-хьхьичI ишан жагьилтурайн ларсун буну тIий.
БатIаврил ахир дуллай, Башикар ХIасановнал кIицI лавгунни цумур-духьурчагу диндалул оьвчаву хъинмунийнсса душиву, дуклаки оьрчIахьрив тавакъю бунни шай­ссаксса чIявусса луттирду ккалан, билаятрал тарих лахьлан.