[dropcap]Н[/dropcap]оябрьданул 22-нний МахIачкъалалив Р. ХIамзатовлул цIа­ний­сса Национал библиотекалий хьунни «Культурардал диалог» тIисса цIанилусса Жагьилтурал этнофорум.

Бадрижамал Аьлиева
[dropcap]М[/dropcap]унил лагрулий ва кьини хьунни личIи-личIисса батIавуртту. Культуралул аралуву творчествалул жагьилтурал бугьлагьи­сса кIану ххал бигьлагьисса «ккуркки столданул» давривух гьуртту хьунни республикалул районная ва шагьрурдая бувкIсса культуралул зузалт.
Хьунни М. Жамаллул цIанийсса Да­гъусттаннал художествалул училищалуву дуклакисса чIава художниктурал арт-проектгу. Студентътурал ккаккан бунни мастер-классру, усттарну дирхьунни личIи-личIисса суратру.
Хьунни Дарбантлиясса жагьилсса художник Мирисмяил Сяидовлул дирхьу­сса суратирттал выставкагу. Ва выставкалул ляличIишиннардивасса ца дия художник увния шинайва къюкIсса, гъалгъа тIун къабюхъайсса ушиву. Ванал хиял бусса бия Москавливгу дувансса цалла выставка, амма, выставка тIитIлатIисса кIанай ихтилатру бувсса искусствоведтурал ва художниктурал тIимунийн бувну, му хиял щаллу хьуншиврул чара бакъа аьркинну дусса дур пишакарсса художниктурал Мирисмяиллул творчествалухсса къулагъас. Ванал цалла дирхьусса суратру къадаххайсса дур. Амма, ванал ниттил Эльмирал бусаврийн бувну, Мирисмяиллун ччай бусса бур цалла суратру даххаврил аукцион буван ва микку хьусса арцу къашавай­сса оьрчIан харж дуван.
Ва кьини хьусса мероприятиярттава­сса цану дия республикалул халкьуннал канил пишардал выставкагу, мунивух гьуртту хьунни Лакрал, Ахъушиял, Къайтагъуллал, Дахадаевуллал, Хивуллал, Хасавюртуллал районнаясса ва МахIачкъала, Къизлар шагьрурдаясса усттартал, ккаккан бунни агьалинал багьу-бизу, янна-ка.
Этнофорумрал хъин дайлитIуну хьунни хъуннасса концерт, цилгу цал ххишалану тасттикь буллалисса Дагъусттаннал халкьуннал авадансса культура, багьу-бизу бушиву. Мунивух хьхьичIунсса гьурттушинна дунни Лакрал райондалиясса «Гъази-Гъумучи» ансамбльданул ва Ахъушиял райондалиясса «Бархъарадуш» ансамбльданул.