[dropcap]М[/dropcap]ахIачкъалаллал клиникалул азарханалий (хьхьичIва ванийн учайссия «Портрал азархана» куну) хирургиялул отделениялул каялувчину зий КIулушацIрал

 

шяраватусса Шамиллул арс ХIажиев МахIаммад.

---

Имара Саидова
Цума-цагу хIакиннал буллалисса захIматран яла лаваймур кьимат бур къашайшалт рязину личIаву. КъачIявуну хьунабакьай хIакиннахь барчаллагь тIисса инсантал цIанасса заманнай. Мукунма нажагьсса хьунабакьай уква операция бунни, ххуйну буруглай бия тIисса инсанталгу. Уттигъанну «Илчи» кказитрал редакциялийн увкIунни МахIачкъалаллал клиникалул азарханалий хъин хъанай ивкIсса, Маркьиял шяравасса, Кьурбанов Жалут Мусал арс. Жалут буслай бусан къашавай ия Аьрасатнал лагрулий­сса МахIачкъалаллал клиникалул азарханалий (хьхьичIва ванийн учайссия «Портрал азархана» куну) хирургиялул отделениялул каялувчину зузисса хIакинная – жула лаккучу, КIулушацIрал шяраватусса Шамиллул арс ХIажиев МахIаммадлуя. Жула буккулт­рангу укунсса хIакинная кIулну бикIаншиврул, на хьунабавкьура ванащал.

[pullquote]Даврий винма яла дакIний личIансса иш цукунсса хьур куну, цIувххукун, МахIаммадлул бувсуна, Кочубейлив­сса азарханалий, къюкIлийн ххаржандалул щаву диян дур­сса къашайшала хха­ссал уллай, ххюра ссят­рал мутталий буллай ивкIсса операциялия. [/pullquote]
Клиникалул хIаятравун бухлахийни, найдунура итталун дагьлай дия марцIшиву ва низам. Азарханалул хьхьичI бия мурхьирдал вив лавсъсса, тIутIавун ва щюллишиврувун бахьлавгсса парк. Азарханалийсса къашайшалтгу бия цивппа шикку санаторийлий кунма буру тIий.
2011 шинал шикку хирургиялул отделение тIивтIуния шихунай мунил хъунаману зий ур хIакин-хирург МахIаммад ХIажиев. Шиккун учIаннингу медициналул даврий ванал биялсса опыт бивкIун бур.
1995 шинал Дагъусттаннал медициналул институт къуртал байхту, хьхьичIунну дуклай ивкIсса жагьил найунува хирургну увцуну ур Кочубейливсса медсанчастьрайн. Хъунма хIал къавхьуну увцуну ур Тарумовкаллал азарханалийн хирургну зун. 1999 шинал ва тIалав увну ур МахIачкъалаллал муххал ххуллул азарханалий зун. Шикку зий дурну дур 11 шин.
Гьашину 6 шин бартлаглай дур МахIачкъалаллал клиникалул азарханалий хирургиялул отделение тIиртIуну. «Ва отделение цIуну тIитIлатIисса чIумал, къашайшалтрансса кроватьру, тумбочкартту батIлай, цимурцаннал ттунма занан багьлай бу­ссия», — тIий, дакIнийн бутлай ур МахIаммад.
ЦIанакул хирургиялул отделениялий, укунма хъин буллали­сса къашайшалт хIисав къабувну, буллай бур кьинилун кIива-шанма операция.
ХIакьину ва отделениялий Ма­хIаммадлущал архIал зий ур лавай­сса квалификация дусса ялагу кIия хирург ва ца оториноларинголог. Хирургиялул отделениялий бур 17 къашайшалансса кIану. Шикку операцияртту буллай ва дарурттайну хъин буллай бур сситтучIикIраву чартту бусса, аппендэктомия, варикоцели ва гидроцели, геморрой, артрозру, бурчуйсса зарал бакъасса дурухлурду дусса ва цаймигу азарду дусса инсантал.
Цала даву ххуйну кIулсса хIакинтал ччяни кIул шай агьалинан. Шиккун нани­сса чIявуми къашайшалтгу бур МахIаммад Шамильевичлул цIа дургьуну букIлакIисса. Мяйжаннугу, хIакин хьхьичIва-хьхьичI икIан аьркинну ур цала иттав бурувгсса къашайшалтрай дакI цIимисса, личIлулсса аякьа дуллалисса.
ЧIивинияцIавасса хIакин хьунсса цала хиял МахIаммадлул хьхьу-кьини дакъа медициналул элму куртIну лахьлай бувсса захIматрайну дузрайн буккан бувну бур. Ванал буттан Шамиллун хъинну ччай бивкIун бур арсная хIакин хьуну. Утти МахIаммадлул къушлий циняв медиктал бур: кулпат бур невропатолог; хъунама арсгу, буттал пиша язи бувгьуну, гьашину дуклан увххун ур Медициналул институтравун.
Даврий винма яла дакIний личIансса иш цукунсса хьур куну, цIувххукун, МахIаммадлул бувсуна, Кочубейливсса азарханалий, къюкIлийн ххаржандалул щаву диян дурсса къашайшала ххассал уллай, ххюра ссятрал мутталий буллай ивкIсса операциялия.
Лавайсса категориялул хIакин МахIаммад ХIажиевлул був­сса захIматрахлу лайкь дурну дур Аьра­сатнал ЦIуллу-сагъшиву дуруччаврил министерствалул чулухасса цикссагу хIурматрал грамотартту ва барчаллагьрал ча­гъарду.
Ванал цала яла хъунмур наградалун ккалли бай къашайшалтрал чулухасса барчаллагьру.

МахIаммадова Раиса:
— МахIаммад Шамильевичлул бунни ттул сситтучIикIрай операция. Ххуйну хьунни операциягу, рязину ливчIунна навагу. МахIаммад Шамильевич, буниялагу, Заннаясса хIакин ур. Ванал карунна­хьхьун нава багьаврия пашман къавхьура. Ва клиникалий, цимурца хIисавравун лавсун, щаллу дурну дур къашайшалт­рансса шартIру. КIицI къалаган къахьунссар къашайшалтран дуллалисса, ичIура кунна, нахIусса дук­рардугу.

Мирошникова Людмила:
— На ттула оьрмулуву цалчинна азарханалийн багьсса. Шиккун нанийнигу, хъинну буруккинттарай бивкIра, азарханалий бацIан къахьунссар, гьантта бикIан шаппай зананна тIий. Амма ттун шикку­сса хIакинтуралгу, медсестрахъалгу аякьа муксса ххуй дирзуннихха, цалчинсса гьантрайва бувчIунни нава нахIакьдан нигьабувсун бивкIшиву. Ттун нава клиникалий бушивувагу асар къавхьунни, ичIура куннасса тагьар дур ши­кку. Ва гьарица кьини учIай цала къашайшалтрачIан, гьарманах вичIи дишай. Шамильевич палаталувун уххайхту, му ххал шайхту, яхъанансса гъира-шавкь ххишала шай.