[dropcap]Л[/dropcap]аргсса итникьини МахIачкъалалив, Дагъусттаннал халкьуннал шаэр Фазу Аьлиевал цIанийсса скверданий, мунин чарвитул гьайкал дацIан дурсса мажлис хьунни. ЧIявусса къуллугъчитал, культуралул зузалт, литература ва Фазу Аьлиевал творчество ххирами, цайми регионнаясса хъамал бавтIун бия шадлугърайн.
П. Рамазанова
[dropcap]Г[/dropcap]ьуртту хьунни Республикалул БакIчинал къуллугъ чIумуйну биттур буллалисса Владимир Васильевгу. «Фазу ХIамзатовнал цIа дунияллул гьарцагу мурцIний машгьурди, ванил творчество Зунттал билаятрал культуралул лишанни, Дагъусттаннал халкьуннал пахрулунсса цIар. Гьашину жува ванил 85 шинал юбилей дуллай буру, кIира шинни ва дунияллия лавгун, амма ванил луттирду, шеърирду, творчество абадлий жущалла дикIантIиссар. Фазу Аьлиева цила шеърирдайну буттал кIанттух, аьрщарах, тIабиаьтрах, дунияллух ччаву дуван лахьхьин буллай бур, ванил назмурду – рувхIанийсса ххуйшиврул ва марцIшиврул дунияллийнсса чIавахьулу хханссар», — увкунни В. Васильевлул.
Дагъусттаннал Чичултрал союзрал председатель МахIаммад АхIмадовлул чIурчIав дунни Фазу Аьлиева хьхьичIва-хьхьичI ватандалул шаэр бушиврий. «Московский литератор» кказитрал хъунама редактор Иван Голубничийл кIицI лавгунни СССР-данул ва Аьрасатнал Чичултрал союзирттай Фазу Аьлиевал сий диркIшиву, му совет заманнул ва уттизаманнул литературалул цIа гьаз дурсса чичу бушиву. МахIачкъалаллал мэр Муса Мусаевлул бувсунни Фазу Аьлиевал гьайкал мунин цинма сайр буллан ххирасса паркраву дацIан дуршиву ва му паркрангу поэтессал цIа дирзшиву.
Фазу Аьлиевал арснал, «Лезгинка» ансамбльданул директор, Жамбулат МахIаммадовлулгу бувсунни нину дунияллия ларгния махъ цува му паркравун къалагайшиву, гикку нину къалякъинсса кIулну тIий, утти цува цинма ххирасса паркравун «зана хьусса» ниттичIан кIункIу тIунтIишиву. Бувсунни ниттихасса агьалинал ччаву асар хъанай душиву ва цалва щалвагу тухум барчаллагьрай бушиву. Гьайкалдануха зий бивкIун бур Аьрасатнал лайкь хьусса художник Александр Лохтачев ва скульптортал Ярослав Барков, Ольга Зубкова. Вара кьини кIюрххила Фазу Аьлиевал гьаттай тIутIив дирхьуминнавух бия Дагъусттаннал культуралул министр (врио) Зарема Буттаевагу. Гьанттайн чIумал Оьруснал театрданул залданувугу хьунни Фазу Аьлиеван хас бувсса хъунмасса мажлис. Ванил дайдихьу дуллай, Халкьуннал Мажлисрал председательнал хъиривчу Камил Давдиевлул дурккунни Федерациялул Советрал председатель Валентина Матвиенкол Дагъусттаннал агьали Фазу Аьлиевал юбилейращал барча буллалисса телеграмма. Ихтилатру бунни мукунма Дагъусттаннал ХIукуматрал хъунаманал хъиривчу Анатолий Карибовлул, Москавуллал Чичултрал союзрал хъунама Иван Голубничийл, Чачаннал Чичултрал союзрал хъунама Канта Ибрагьимовлул, генерал-майор Оьмар Муртузялиевлул, ДР-лул Халкьуннал Мажлисрал депутат Людмила Авшалумовал ва цаймигу бусравсса вакилтурал.
