[dropcap]Н[/dropcap]оябрьданул 26-нний Ростов-на-Дону шагьрулий хьунни Аьрасатнал чемпионатрал ирглийсса тIуркIу. «Ростов» командалущал ччалли дурккунни МахIачкъалаллал «Анжи» команда.
Р. Къардашов
[dropcap]С[/dropcap]суттихуннай ххувшаврил кьанкьрагу къарирщусса «Ростов» командалул тамашачитурал хьхьичI, къакъунттул хъирив багьну нанисса барзул кунма, ххувшаврил магъ дургьуну, ялтту буккаврил мякь лиххан бан ччай бия. ТIуркIулул 44-мур минутIрай бурвав-бакъарвав тIисса пенальтилийну (му пенальти цуппагу щак бивкIусса бакъая!) бавкьусса голданул ккаккан бунни щил чулух буссарив тIайлабацIулул бияла. Муттаэтурал команда хьхьичIун дурккунни – 1:0.
«Ростов» командалул гьужумчи Бухаровлул бахттилул хьхьури лахъисса духьунссия, 58-мур тIуркIулул минутIрайгу Калачевлул угловойлия бивщусса ттуп ванал жула къапулувух бакIрах бивщуну бавкьунни. Яла «Анжи» командалул хIарачат буллай бия «кIива къалпуз ца каних бугьан», амма ва кьини мукунсса тIайлабацIу къавхьунни. ХьхьичIун уккан, хъирив лаяннияр бигьар. Ахиргу тIуркIу 2:0 счетрайну къуртал хьунни.
«Ростов» — «Анжи» — 2:0
Голлу: Бухаров (44, 58)
Ростов: Абаев, Паршивлюк, Макеев, Ингасон, Вилюш, Байрамян, Калачев (Зуев, 58), Гацкан, Майер, Ионов (Думбия, 86), Бухаров (Дядюн, 69).
«Анжи»: Лория, Тетрашвили, Самарджич, Брызгалов, Полуяхтов, Чайковский, Бакаев, Данченко (Яковлев, 74) Качаев (Лескало, 63), Маркелов, Прудников (Иванченко, 70).
«Анжи» командалул хъиривмур тIуркIу хьунтIиссар МахIачкъалалив Хабаровскаллал команда «СКА»-лущал, жула чIаххувращал, «Анжи» команда дур цалсса Аьрасатнал чемпионатрал 15-мур ххуттай, «СКА» – 16-нний.
