Ца шинал хьхьичI Лакрал райвоенкоматрая аьрали къуллугъ буллан увцуссия Буршиял шяравасса жагьил МахIаммадов Башир ХIасанхIусайннул арс.

[dropcap]В[/dropcap]ай гьантрай бувкIунни Баширдул нитти-буттачIан аьрали командованиялул цIаниясса барчаллагьрал чагъар, хъирив цIуллуну-сагъну цувагу ивунни. Нитти-буттан цала арс-душния цIа дуллалисса чагъарданияр хъуннасса бахшишгу къадикIай. Баширдул нитти-буттангу хар-хавар бакъасса ххаришивуну хьунни ва чагъар:
«ХIурмат бусса ХIасанхIусайн Баширович ва Къиргъу ХIусай­новнай! Зул арс, ефрейтор Ма­хIаммадов Башир, жул 13204-мур аьрали частьрай шинал лажиндарай къуллугъ буллай уссия. Аьрали касму ххуйну лахьхьаврицIун, зул арс тIай­ламур ххирасса, хьхьичIун урувгсса, ас-ламус бу­сса, буттал кIану ххирасса ва му буруччин мудана хIадурнасса жагьил ия. Ванал хIурмат бия архIал къуллугъ буллалиминнал ва командиртурал дянив. Баширдул лажин кIялану дувайва цайнна тапшур дурмур, цала чулухунмай хIурмат багьанну къуццу тIий ия. Частьрал хъуниминнал цIанияту на зухь барчаллагь тIий ура укун ххаллилсса арс тарбия увну тIий. Умудрай ура цала цIакьсса ва куртIсса кIулшивурттугу, бюхъу-хIарачатгу Баширдул армиялия махъгу ккаккан бувантIишиврийн ва билаятран хайрну къуццу тIуншиврийн!
13204 аьрали частьрал хъуниминнал цIанияту штабрал хъунама А. Шишкин;
Частьрал командир,
полковник О. Федин

ЦIусса шинал бухкIуллий укун ххуйсса бахшиш дур­сса Башир, финансовый техникумгу бувккуну, зий уссия Гъумук шяраваллил хозяйствалул банкрай. Цала кIулшивуртту куртIгу, цIакьгу дуваву мурад­рай, дуклай ур институтравугу. Шяраваллил жяматрангу хъунмасса умуд бур ва жагьилнал уттигу, чув, ци даврий зурчагу, барчаллагьрал чагъарду, хIурматрал лишанну лайкь дувантIишиврийн.
Армиялийн лавгцири, Башир кунма, чIумуй, сагъну нитти-буттал ялун бияваннав.
Амин!
ХIусайн Давыдов,
ш. ЧIурттащи