Жула кIия къучагъ

Ноябрьданул 25-26-нний Польшанал Быдгощ шагьрулий хьусса лачIунбуккаврил дунияллул чемпионатрай ххув хьунни кIия Да­гъусттаннал лачIунукку.

Бяст-ччаллал цалчинмур кьини яла лахъмур хIурматрал шачIанттуйн лавхъунни 86 килорал кIушиврий лачIун уклай ивкIсса Аьлихан Жабраилов. Турнирданул финалданий Да­гъусттаннал лачIунукку ххув хьунни Къазахъисттаннаясса Азамат Даумтбековлуяр. Хъиривмур кьини чемпион хьунни 74 килорал кIушиврий ХIажи Набиев. Финалданий му ххув хьунни Словакиянавасса Асхарбек Гулаевлуяр. КIиягу Да­гъусттаннал лачIунукку занай ур МахIачкъалаллал «Динамо» спортшколалийн, миннал тренерну ур Аьрасатнал лайкь хьу­сса тренер Иманмурза Аьлиев. Ца ялагу Дагъусттаннал лачIунукку, МахIаммад Дибиров, 125 килорал кIушиврий лачIун уклай уссия финалданий, амма му ух хьунни Гено Петрашвили тIисса гуржиричунаяр. Дунияллул чемпионатрал хIасиллайну Аьрасатнал цачIундур командалул бувгьунни цалчинмур кIану, мунил ларсунни 3 мусил, 1 арцул ва 1 чарвитул медальлу.