[dropcap]Л[/dropcap]аргсса нюжмаркьини Дагъусттаннал Журналистътурал союзрал ва «Аьрасатнал миллатирттал Ассамблея» ДРО ООО-лул цачIусса батIаву хьунни.

З. АьбдурахIманова
[dropcap]Ш[/dropcap]икку гьуртту хьунни миллатирттал кказитирттал, телерадиокомпаниярттал хъуними редактортал, аьлимтал, журналистътал ва ДР-лул Халкьуннал Мажлисрал депутат Людмила Авшалумова.

БатIаврил мурад бия респуб­ликарттай ниттил мазру ла­хьхьаврил хIакъираву закон кьамул дан аьркинссар тIисса, мазру буруччаврил давриву респуб­ликалул каялувшиндарайнсса оьвчаврий цаппара насихIатру бусансса.
БатIаву тIитIлай, «Аьрасатнал миллатирттал Ассамблея» ООО-лул Дагъусттаннайсса отделениялул каялувчи Зикрулла Илиясовлул кIицI лавгуна махъ заманнай республикалул школарттай байбихьулул классир­ттаву, хаснува щархъалминнуву, зерххушиву ниттил мазрай дарсру дихьлансса ихтиярду. Ниттил маз щархъавусса оьрчIал лахьлай бушиву так дарс хIисаврай. Масалдаран, 2016 шинал 500 школалул хIукму бувну бур ниттил мазурдил ва литературалул дарсру чанну дишин ихтияр дуллалисса №2 дуккаврил пландалийн чул бивщуну зун. Миллатирттал мазурдихсса би­ччибакъасса къулагъасрацIун, хъунна хъанахъиссар мазру бувагу-бухлаган бюхъаврил нигьачIишивугу.
ЦIана жулла республикалий аьмну кIулшивуртту дуллали­сса 1454 идара бусса бур зий. Миннувату 1223 школа бусса бур ца миллатрал оьрчIру дуклакисса. Школарттай ниттил мазру дихьлахьисса 2808 учитель зий усса ур хъинну чансса харжирдацIух.
Ниттил мазурдил учительтурал гьар кIанай гьаз баймур ва цIурувкьюмур масъалагу – оьрчIансса луттирду, методикалул литература, чIалачIи пособиялул материаллу цал давриву диял къахъанахъаврияссар бикIайсса. З. Илиясовлул ши­кку чIурчIав дурунни шиная шинайн миллатирттал мазурдийсса кказитругу ссуссукьу буллалаврий.

Руслан Башаев, «Илчи» кказитрал хъунама редактор:
— Ттул пикрилий, ца миллат яхъанахъисса, ца мазрай гъалгъа тIисса республикарттай жуннаксса хъуннасса нигьачIишиву дакъассар. Татарнал, чачаннал, аьсатIиннал ва м.ц. мазурдил дарсру школарттай чан дарчагу, тайннал хьхьугу-кьинигу ниттил мазурдий зузисса телевидение, буклакисса кказитру, журналлу буссар. Дагъусттаннал каялувчитурал кьамул дан аьркинссар миллатирттал мазурдин зарал къахьунсса, жулами хIуччарду хьхьичIун лавсъсса закон. ХIукуматрал даражалий унгу-унгуну зун чIунни ниттил мазру буруччаврил ххуллий.

Луиза Аьлиханова, ГТРК «Дагъусттан» телерадиокомпаниялул хъунмур редактор:
— Махъппурттуву чIаланну къулай хьуссар жул телерадиокомпаниялул каширду. ХIакьину миллатирттал мазурдийсса жул радиолух вичIидишин бюхъай­ссар FM каналданий. Зуруй цал дуккайссар ссят ва дачIиннуйсса миллатирттал мазурдийсса телепередачартту. Жу мудангу хIадурссару ниттил мазурдийсса оьрчIансса передачартту дикIан аьркинссар тIутIиминнащалгу зун. ХIадурссару ниттил мазрал дарсру дихьлахьисса учительтуращал зун, мюрщултрансса видео-дарсру цачIу ххал диргьуну, ми ккаккан дуллан.

Баху МухIуттинова, яруссаннал мазрал дарсру дихьлахьи­сса Учительтурал ассоциациялул хъунмур:
-Жу дахьва-дахьва ва ассоциациягу сакин дурну, миллат­рал мазрал учительтал ца ккуран хьуну, маз ябансса мурад­рай жула гужгу, чIунгу харж дуллай буру.
БатIаврий, гьарнал ва ма­съалалул хIакъиравусса пикри-зикрилухгу вичIи дирхьуну, хIукму хьунни шикку хьусса насихIатру чивчусса чагъар тIайла буккан республикалул каялувчитурайн ва муниципал районнал хъуниминнайн.