[dropcap]Н[/dropcap]оябрьданул 8-нний Дагъусттаннал БакIчинал кIанайма Владимир Васильевлул каялувшиврулу хьунни ДР-лул ХIукуматрал батIаву. Микку ххал бивгьунни ЖКХ-лул объектру 2017-2018 шиннардий къатравун гъилишиву нани даврил чIумуйн хIадур шаврил масъалартту.

ДР-лул строительствалул, архитектуралул ва ЖКХ-лул министр Ибрагьим Казибековлул бусаврийн бувну, октябрьданул 15-нний гъилишиврул щаллу буллай байбивхьуну бур республикалул шагьрурдал ва районнал социал идарартту (школартту, азарханарду, оьрчIал садикру ва яслирду). ЧIявуквартирартту бусса къатри гъилишиврул дузал буллай бур Къизлардай, Каспийскалий, МахIачкъалалив, Хасавюртлив, Южносухокумскалий, Избербашлив, Дарбантлив.
ДР-лул Госжилинспекциялул каялувчи Аьли Жабраиловлул бувсунни, аьмну лавсун, кIинтнийн хIадур шаву цила низамрай, пландалийну най душиву, цаппара муниципалитетирттай личIаннин.
Владимир Васильевлул дакI­нийн бувтунни Дагестанские Огни шагьрулий кIинтнил чIумуйн хIадур шаврил давуртту графикрай ккаккан дурминнуяр махъун дагьну душиву. «МахIачкъалалив, Дарбантлив, Дагестанские Огнилий, Къизлардай ЖКХ-лул объектирдай аьркинссаксса лагрурдай дузал дурну дакъар апатIсса ишру бухлаган бансса материаллал ва техникалул луртанну. Дарбантлив, Избербашлив, Буйнакскалий, Хасавюртлив, МахIачкъалалив социал объектру дакьин дурну дакъар, цаппара объектирдал бутIри ба­ххана буван аьркинну бур, электроэнергиялул щаллу байсса луртанну хIадур дурну дакъар. Мукуннасса тагьар дур Агъуллал, Бабаюртуллал, Дахадаевуллал, Казбекуллал, Хайдакьуллал, Къизлардал, Ну­гъайнал ва Тарумовкаллал районнал азарханардайгу.
— Зу инспекцияру, зуятур даву тIалав дантIисса. ТIювардал фонд­рал циняв масъалартту щаллу буван аьркинсса так шикку щябивкIминналли. Жуярва ххишала шикку цучIав акъархха, му жулва аьмсса масъалар. Шагьрурдал халкьуннан личIишиву да­къассар ми щинал щил щаллу буллалиссарив. Крандалува нанисса щин дикIан аьркинссар гъилиссагу, марцIссагу. Мунил жаваб дуллалиссар властьрал, яни жура. Му куццуй зун аьркинссару жува. Мунийн хIадурнугу бикIияра. На зуяту тIалав дуллай ура хъин чулийсса дахханашивуртту, — увкунни Владимир Васильевлул.
Ххал бигьлагьисса масъалалул хIакъираву ихтилат бунни «Дагестанская сетевая компания» АО-рал директор Муртазяли Гитинасуловлул.
БатIаврий ххал бивгьунни цаймигу масъалартту.

ХIадур бувссар
ХI. Аьдиловлул