[dropcap]О[/dropcap]ктябрь зурул 23-нний КIулшивуртту дулаврил ва элмулул иширтталсса буллалисса ПаччахIлугърал Думалул комитетрал председательнал цалчинма хъиривчу Геннадий Онищенко хьунаавкьунни Дагъусттаннал паччахIлугърал медициналул университетрал студентътуращал. Шикку гьуртту хьунни ДГМУ-лул ректор Сулайман Маммаев, Дагъусттаннал цIуллу-сагъшиву дуруччаврил министрнал кIанайма Танка Ибрагьимов, ДР-лул Роспотребнадзорданул управлениялул каялувчи Элеонора Оьмариева, ДГМУ-лул Элмийсса советрал члентал.
А. Аьбдуллаева
[dropcap]С[/dropcap]улайман Маммаевлул бувсунни октябрь зурул 23-24-нний Дагъусттаннай хьунтIишиву аьмсса кIулшивуртту дулаврил даража гьаз баврин хас дурсса, КIулшивуртту дулаврил ва элмулул иширттаха зузисса ПаччахIлугърал Думалул комитетрал заседание.
— Аьмсса кIулшивуртту ласаврил даража гьаз къабувна, ларайсса кIулшивуртту ласаврил даража гьаз баврия гъалгъа тIун къашайссар. На ххарира ва хIакьинусса Дагъусттаннал медуниверситетрал студентътуращалсса хьунабакьаврил сиптачи Геннадий Онищенко хьуну тIий. Ва уттинингу цимилагу Дагъусттаннайн увкIун ивкIсса, жучIара эпидемияртту сукку хьусса чIумал хъуннасса даву дурсса, Дагъусттаннал лайкь хьусса хIакинни. Ва хIакьинусса заседание хас дурну дур медициналул пишакартал хIадур баврил даража гьаз баврин, — увкунни Сулайман Маммаевлул.
Геннадий Онищенкол бувсунни студентътурахь 1994 шинал, Дагъусттаннай холера сукку хьусса чIумал, цивппа зий бивкIсса куц.
— ДачIи шин дурссия жу Дагъусттаннай зий. Хъинну захIматсса чIун дия. Дагъусттаннал ХIукуматрал ттул захIматран ххуйсса кьимат бивщуна. 1995 шинал ттун «Дагъусттаннал лайкь хьусса хIакин» тIисса бусравсса цIа дуллуна.
Муниннин хьхьичIгу, совет заманнайгу, увкIссияв на Дагъусттаннайн. Та чIумал на СССР-данул ЦIуллу-сагъшиву дуруччаврил министерствалий зий икIайссияв. Та аьрххигу ттул мива эпидемиялул масъаларттацIун бавхIусса хьуна. ХIакьинусса билаятрайсса медициналул ВУЗ-дал аккредитация дуллалисса Аьрасатнал медициналул лигалий каялувшиву дуллай ура. Лигалуву 300-нния ливчусса экспертътал буссар. Вай цинявппагу медициналул аралувусса хьхьичIунсса пишакартал, аьлимтал бур, — увкунни Г. Онищенкол.
«Надзор за инфекционными болезнями: актуальные вопросы биобезопасности в РФ» тIисса цала докладраву Геннадий Онищенкол бувсунни билаятрай лахъай азардащал цукун талай буссарив, цIанасса чIумал эпидемиологиялул тагьар цукунсса дуссарив. Ванал гьаз бунни ттизаманнайсса биологический нигьачIавурттал, миннувух биологический терроризмалул, кьюлтIсса экологиялул дяъвирдал, цIусса ва зана дикIлакIисса лахъай азардал масъалартту.
Геннадий Онищенкол мукунма кIицI лавгунни Дагъусттаннал чIаххуврайсса хIукуматирттай аьралуннал микробиологтал бушиву, биологиялул ярагъ ишла бансса нигьачIаву душиву.
— Жунма аьркинссар лахъай азардал пишакартал хIадур буллан, мукунма лахъай азардая кIулшивуртту дусса терапевтътал хIадур буллан, — увкунни ванал.
Хъирив Сулайман Маммаевлул бувсунни ВУЗ-ву медициналул кадрарду цукун хIадур буллай буссарив.
Ахирданий шикку гьуртту хъанахъиминнал суаллу буллунни Геннадий Онищенкохьхьун.
