ЦIуссалакрал райондалий­сса кIулшивуртту дулаврил идарарттай мудангу дуллан бикIай оьрчIру итххяххан баву мурадрай­сса мероприятияртту. Вай гьантрайгу ЦIуминалийсса Чапаевкаллал шяравусса «Солнышко» садикраву хьунни ссутнин хас дурсса байран. Гьарица чIумал кунна, ва ххуллухгу музыкалул каялувчи Надира АхIмадовал хIадур дурну дия утренникрайнсса авадансса программа.

И. Саидова
[dropcap]Б[/dropcap]айрандалий оьрчIал бувккунни ссутнихасса шеърирду, увкунни балайрду, дунни къавтIавуртту, бувккунни тIуркIурдай, ккаккан бунни магьравасса инсценировкартту. ЧIалай бия унгу-унгуну байрандалийн хIадур хьуну бушиву садикрал тарбиячитал ва цинявппагу зузалт. Ссутнин хасну чIюлу бувну бия байранну дайсса садикрал зал. Утренникрай оьрчIан ляличIинува ххуй бивзунни магьравасса персонажирттайн кIура бавсса, усттарну роллу дугьлагьисса цала тарбиячитал Арчилаева Зулайхат ва ХIусайнова Асият.
Садикрал жанахIраву дия ссутнин хасну дурсса эмаратсса давур­ттал выставка. Баян бувну бия каруннах дурсса магьирсса давурттал конкурсгу. Жюрилул, цаннияр ца эмаратсса давурттава царагу личIи дан къархьуну, цинявннун лавай­сса кьиматру бивщунни.
— Укунсса давурттавух оьрчIру гьуртту булларчанни, миннаву личIи-личIисса гьунарду аьч шай­сса, чIивинияцIава тIабиаьт лахьлансса, муниха аякьа дуллансса гъира-шавкь дагьайсса, — тIий буслай бур садикрал хъунмур Оксана Исмяилова.
Ссутнин хас бувсса мажлисру хьунни цинявппагу группардаву.