Аьрасатнал жагьилтал – цалчинмур ххуттай

ДР-лул ЗахIматрал министерствалул «Успех» тIисса жагьилтал давурттал дузал буллалисса центрданул директор, региондалул WorldSkills центрданул каялувчи Шамил МахIаммадов гьуртту хьунни Абу-Дабилий хьусса захIматрал пишардал усттаршиву ккаккан дуллалисса 44-мур чемпионатрай.Аьрабусттаннай ва чемпионат най буссия октябрь зурул 14-15-нний. Шикку гьур­ттушинна дурссар дунияллул 77 билаятраясса 1300-нния ливчусса жагьилсса пишакартурал.


И. Саидова
ДакIнийн бутанну, WorldSkills хъанахъишиву дунияллул халкьуннал дянивсса коммерческий дакъасса суккушинна. Ва чемпионатрай гьуртту хъанахъисса билаятирттал жагьилтурал дянив шинай кIилва шайссар захIматрал пишардал усттаршиву ккаккан дуллалисса бяст-ччаллу.
Чемпионатрай Шамил Ма­хIаммадов хьунаавкьуну ур дунияллул халкьуннал WorldSkills суккушиндарал президент Саймон Бартлищал, «Молодые профессионалы» Союзрал хъунама директор Роберт Уразовлущал ва чIявусса цаймигу билаятир­ттал вакилтуращал.
Роберт Уразовлущалсса ихтилатраву Шамил МахIаммадовлул кIицI лавгунни, цува ДР-лул ЗахIматрал министерствалул тIалавшиндарайн бувну, ттизаманнул технологиярттал цIушиннарду ва билаятирттал пишакартурал даврил опыт ла­хьхьаву мурадрай увкIшиву.
— Цуксса хIайпнугу, Да­гъусттаннаясса делегациялуща ва чемпионатрай гьурттушинна дан къабювхъунни. Республикалий ялу-ялун машгьур хъанай най бур WorldSkills чемпионат, умуд бур ялунчIилсса шинал вай чемпионатирттай Дагъус­ттаннаясса делегациялул гьурттушинна данссар тIисса, – увкунни МахIаммадовлул.
Роберт Уразовлул бувсунни ялунчIилсса чемпионат Аьрасатнаву хьунтIишиву ва шикку гьуртту хьунтIимигу чIявуми жула билаятраясса бикIан аьркиншиву.
Абу-Дабилий хьусса чемпионатрай бяст-ччаллу хьунни строительствалул, IT-технологиялул, искусствалул, дизайндалул, транспорт дакьин даврил ва цаймигу пишардал усттаршиву ккаккан давриву.
Ва чемпионатрай Аьрасатнал командалул, цалчинсса кIану бувгьуну, ларсунни 11 медаль.
Аьрасатнал командалул ляличIисса усттаршиву ккаккан дунни «Веб-разработка», «ИТ-решения для бизнеса», «Сетевое и системное администрирование», «Ювелирное дело» ва «Экспедирование грузов» пишардаву.
Ва командалул 4 арцул медаль ларсунни парикмахершиврул, кьай-кьуй духхайсса техника дакьин даврил, мобильный роботехникалул даврил магьиршиву кка­ккан давривугу.
Жулва жагьилтурал 21 медаль лайкь дунни командалул пишардал магьиршиву, пишакаршиву ккаккан давривугу.
Шиккува кIицI лаган, 45-мур WorldSkills Competition захIматрал пишардал усттаршиву ккаккан дуллалисса чемпионат хьунтIиссар Аьра­сатнаву 2019 шинал август зурул 29-нния сентябрь зурул 3-ннийн бияннин. Шикку гьурттушинна дантIиссар 60 билаятраясса 1500 пишакарнал.