[dropcap]О[/dropcap]ктябрь зурул 30-нний ЦIуссалакрал райондалул агьалинащал хьунабавкьунни ДР-лул Халкьуннал Мажлисрал председательнал хъиривчу Камил Давдиев, ДР-лул Халкьуннал Мажлисрал депутат Жяъпар Абуев, МахIачкъала шагьрулул мажлисрал депутат Рустам Кьурбанов.

---

[dropcap]К[/dropcap]амил Давдиевлул гьарта-гьарзасса ихтилат бунни цIанакул республикалийсса тагьардания. Мукунма бувсунни Республикалул Халкьуннал Мажлисрал гьарца сессиялия махъ, цинявппа депутатътал шагьрурдаясса ва районнаясса цала избирательтуращал хьунабакьлан аьркиншиву.
— ЦIуссалакрал райондалул активращал хьунабакьин жу мудангу ххариссару. Барчаллагьрай буру ва хьунабакьаврийн жуйнма оьвкусса ЦIуссалакрал райондалул бакIчи ХIажи Аьйдиевлуйн ва ДР-лул Халкьуннал Мажлисрал депутат Амирхан Амирхановлуйн. Райондалийсса агьамсса масъаларттах вичIигу дирхьуну, ми дузрайн буккан бан шайур бан, чIарав бацIан хIадурссару, — увкунни Камил Давдиевлул.
Хьунабакьаврийн бувкIсса агьалинал депутатътурахьхьун буллунни цала масъаларттал хIакъиравусса суаллу.
ЦIуссалакрал райондалул Агьали социал буруччаврил управлениялул хъунама Камил Анкалаевлул гьаз бунни оьрчIал пособиярттал ва коммунал хIаллихшиннардил арцу дулаврил масъала.
ЦIуссачIурттащиял шяраваллил бакIчинал бигарду чIумуйну биттур буллалисса Аминат ХIажиевал сукку бунни ва шяравалу газрал щаллу даврил масъала.
Барчхойотар шяраваллил бакIчинал миннат бунни шанна шяраву оьрчIру футболданий буккайсса майданну бан кумаг баву.
Депутатътурал махъ буллунни шикку гьаз бувсса цинявппагу масъалартту щаллу бан кумаг бансса.

И. Саидова