Самболул турнирданий

Ноябрьданул 18-нний Каспийскалий Аьли Аьлиевлул цIа­нийсса Спортрал къатраву хьунни самборал Аьрасатнал Виричу Адильгарай МахIаммадтIагьировлул цIанийсса Аьрасатнал турнир. Бяст-ччаллавух гьуртту хьунни 150-яр ливчусса спортсментал.

Республикалул БакIчинал цIанияту бавтIминнахь аьла-ссалам буллалисса махъ лавхъунни Да­гъусттаннал ХIукуматрал Председательнал 1-ма хъиривчунал кIанайма Анатолий Карибовлул.
Махъру лавхъунни мукунма Дагъусттаннал МВД-лул УРПС-рал хъунама Сахават Сахаватовлул, ДР-лул ХIукуматрал Председательнал хъиривчунал кIанайма Шамил Исяевлул, отставкалий­сса КГБ-рал генерал-майор ­Оьмар Муртазялиевлул, Адильгарай МахIаммадтIагьировлул гъанчу Набиюлла МахIаммадовлул.
Турнирданий сайки циняв чурххал кIушивурттай ххув хьунни Дагъусттаннал спортшколар­ттал вакилтал: Исраил ХIажиев (52 кило МахIачкъала), Велимурад Алхасов (62 кило, МахIачкъала), Самад Аьбдулманапов (68 кило, Каспийск), Мурат Тляруков (74 кило, Ставрополь), Шамил-агъа Амиров (82 кило, Каспийск), Сяид Сяидов (90 кило, МахIачкъала), ХIадис Ибрагьимов (100 кило, МахIачкъала), Паша Хархачев (+100 кило, МахIачкъала).
Аьрасатнал турнирданул яла хъуннамур зава – «Лада Гранта» машина буллунни Рашид Вагьабовлун.