[dropcap]О[/dropcap]ктябрьданул 25-нний Национал библиотекалул конференц-залдануву ДР-лул Россельхознадзорданул пишакартурал ва шинал 3-мур кварталданий дурсса давурттал аьмсса тагьардания бусласисса гьарта-гьарзасса батIаву хьунни. Ваний, идаралул каялувчитал ва личIи-личIисса отделлал пишакартал бакъасса, гьуртту хьунни ДР-лул ХIукуматрал председательнал хъиривчунал къуллугъ чIумуйну би­ттур буллалисса Шамил Исяев ва Билал Оьмаров.

З. АьбдурахIманова
[dropcap]Р[/dropcap]еспубликалул Россельхознадзорданул каялувчи Кьурбан Рамазановлул бувсунни укунсса батIавуртту дувайшиву гьарца кварталданий ва миннуйн чара бакъа оьвчайшиву накIлиха, дикIуха, ахъулсса-ахънилсриннуха ва цаймигу дуки-хIачIиялуха зузисса ишбажаранчитурайнгу.
Кварталданий цал шайсса батIаву цурдагу дувайссар «Реформа контрольной и надзорной деятельности» тIисса программалул лагрулий. Россельхознадзор ялув бацIан буржлувсса къуллугъ бухьувкун, программалул ихтияр дуллалиссар тIайлану, низамлиявуртту дакъа зузисса ишбажаранчитал ва идарартту авара къабуллай, административ дайшишру хIасул къадурну, миннацIун кабакьу буллан.
Кьурбан Рамазановлул бусаврийну, вайннал къулагъасралун ласай­сса бур халкьуннал цIуллу-сагъшиврун нигьачIинна дуну дуки-хIачIиялуха зузи­сса, цала чулухасса диялдакъашивурттаха зун анавар къабуклакисса ишбажаранчитал ва «юридические лица».
«2018 шинал ахирданийннин жул умуд буссар закондалул мюхчан дур­сса аьрщарайн, ххяххиярттайн, ризкьи-жанавартрайн инсан сававну биллали­сса зараллу 15 % лагь хьун бансса ва 2025 шинал ахирданийннингу – 50% лагь бансса», — увкунни Кь. Рамазановлул.
Лавгсса 9 зурул дянив ва къуллугърал пишакартурал 1894 ялув бацIаврил ва хъирив багьаврил давуртту дурну дур. Миннувасса 1238 ишираву низам лиян дурсса кIанттурду ялун личин бувну бур ва 1194 иширал хIакъираву дело сукку дурну дур. Аьмну 2,8 миллиондалунсса аькIри чирчуну дур, миннувагу хIукуматрал хазналувун 2 миллиондалийн дирсса арцу дучIан дурну дур.
Низам лиян дурсса ишру хъунмурчIин ветеринариялуцIун, ризкьи биххай­сса, дикI даххайсса кIанттурдал тагьар­дануцIун, «биоотходру» бат даврицIун дархIусса дикIайсса дур.
Хъирив махъру лавхъсса Билал Оьма­ровлул ва Шамил Исяевлул, Россельхознадзорданул пишакартал барчагу бувну ххуйсса ккаккиярттащал, чIа увкунни давриву тIайлабацIу.
БатIаврий Кьурбан Рамазановлун «ДР-лул шяраваллил хозяйствалул лайкь хьусса пишакар» тIисса цIа дуллунни.
Гихунмай гьарца отделлал хъуниминнал цалла каялувшиннаралу дурсса давурттая бувсунни.