[dropcap]Н[/dropcap]оябрьданул 22-нний Да­гъусттаннал БакIчинал кIанайма Владимир Васильевлул каялувшиврулу хьунни ДР-лий аьдлу-низам щаллу даврил Координациялул маслихIатшиндарал ярглий дакъасса батIаву.

Муний ххал бивгьунни чил билаятир­ттал инсантурал закондалий да­къасса бучIа-лагавурттайн (миграция) ва кьюлтIну зузавурттайн къарши буккаврил масъалартту. Мукунма ххал бивгьунни мува аралуву паччахIлугърал властрал органналгу, кIанттул цилакаялувшиврул органналгу, ихтиярду дуруччай органналгу уртакьну зузаврил даража лавай баву мурадрай дуллалисса давурттан хасъсса масъалартту.
БатIаврий гьуртту хьунни Дагъусттаннал ХIукуматрал Председательнал кIанайма Аьбдуссамад ХIамидов, ДР-лул БакIчинал ва ХIукуматрал Администрациялул Каялувчи Владимир Иванов, ДР-лул Мюхчаншиврул советрал секретарьнал кIанайма Аьбдулмуслим Аьбдулмуслимов ва цаймигу.

***
Гара кьини Владимир Васильев хьунаавкьунни ДР-лий инсаннал ихтиярду дуруччаймур Уммупазил Оьмароващал. Ганищалсса ихтилатраву республикалул хъунаманал бивщунни омбудсменнал давурттан кьимат ва бувсунни му идаралул ляличIисса мяъна душиву инсантурал ихтиярду ва илкиншиву дуруччаврил аралуву.
Уммупазил Оьмаровал бувсунни уполномоченныйнал идаралул шайсса хIарачат буллай бушиву хьхьичI бивхьусса масъалартту биттур баврил ххуллий.
Хьунабакьаврил лагрулий Владимир Васильевлул ва Уммупазил Оьмаровал ххал бивгьунни хIакьинусса кьини Дагъусттаннайсса инсаннал ихтиярду дуру­ччаймунил хьхьичIсса яла агьамми масъалартту.