Найнна дур ссуттилсса призыв

[dropcap]О[/dropcap]ктябрь зурул 1-нний МахIачкъалалив дайдирхьунни ссу­ттилсса призыврал кампания. Жагьилтал аьралуннавун буцлан тIий бур декабрь зурул 31-ннийн бияннин.

ЦIана Аьрасатнал Обороналул министерствалул ва виваллил аьралуннал частирдавун МахIачкъалалия гьан бан тIий бур оьрмулул 18-27 шиннардивусса 250 жагьил. Ми къуллугъ буллан тIий бур Калининградрая, Мурманскалия, Аьрасатнал кьиблалул дазурдая, Ухссавнил Ледовитый океандалийн бияннин.
Жагьилтал аьралуннавун тIайла буклай, миннахь ххуллухъин тIисса ихтилат бунни МахIачкъала шагьрулул аьрали комиссар Муртуз Идрисовлул.
— ХIурмат бусса призывниктал! ДакIний битияра, зу аьралуннаву къуллугъ булланну нанисса. Му бигьалаган лагайсса кIанттурду бакъар. Аьралуннаву хьхьичIра-хьхьичI низам аьркинссар. Бу­ттал улклуя архсса кIанттурдай зу хьунабакьинтIиссару личIи-личIисса миллатирттал ва диннал инсантуращал. Зун гьарица инсаннащал маз лякъин кIулну бикIан аьркинссар. Маз ля­къин хьунтIиссар, низамрайнгу мютIийну, цайминналгу хIурмат буну сукку тIурча. Яла-яла, аьркинссар ссавургу, яхIгу. Дагъусттан – цимирагу ттуршукулий салкьи хьусса, авадансса тарих бусса билаятри. ЧIявусса жула ватанлувтурал мусил хIарпирдай чирчуссар цалла цIарду билаятрал тарихраву. Цинявннан кIулссар Хъунмасса Бу­ттал кIанттул цIанийсса дяъвилий ккаккан дурсса къучагъшивурттайну Совет Союзрал кIийла Виричу, летчик АхIмад-хан Султаннул, Совет Союзрал Вирттал Валентин Эмировлул, Юсуп Акаевлул, подводник МахIаммад ХIажиевлул ва цайминналгу цIарду. ЦIанасса чIумалгу личIи-личIисса питнардаву дагъусттанлувтурал ккаккан дувай цалла чувшиву. ХIакьину аьралуннаву къуллугъ буллан нанисса жагьилминналгу дагъусттанчунал цIа лайкьну дуруччин аьркинссар, — увкунни Муртуз Идрисовлул.
Аьрали комиссарнал бувсунни, аьралуннаву лайкьну къуллугъ буллалиминнаща контракт­рай къуллугъ буллан бацIан бан бюхъайшиву.
Призывниктурахь ххуллу­хъин увкунни Дагъусттаннал Ветерантурал союзрал председатель МахIарам Аьлиджановлул.
— Петр Цалчинманал чIуннардия шихунмай Аьрасатнаву бивкIссар муданмасса аьрал. Баххана був­ссар уставрду, даххана хьуссар низам, техника, ярагъ, амма гьарица чIумалгу аьралуннал мурад ца бивкIссар – Ватан дуруччаву. Ттул пикрилий, Ватан дуруччаврияр бюхттулсса къуллугъ цамур бакъа­ссар, — увкунни М. Аьлиджановлул.
Нитти-буттал чулуха ихтилат бунни Вазирхан Кумаковлул.
— Аьралуннаву къуллугъ буллан яла лайкьми, яла ххаллилми жагьилталли буцайсса. На чIа тIий ура зун, лайкьну къуллугъ бувну, Дагъусттаннал цIагу яларай къаруртун, ссавур дакъа зухва ялугьлагьисса нитти-буттачIан зана шаву. Жу, цинявппагу нину-ппу, зуя пахрулий буссару ва зух ялугьлай бикIантIиссару, — увкунни ванал.
— Жу жуйнна дурсса вихшала зия къаданну, дагъусттанчунал цIа кьюкьин къадурну, эбратну къуллугъгу бувну, зана хьунну, — жаваб дуллунни циняв призывниктурал цIания МахIаммад Бигаевлул.
Шиккува кIицI бан, военкоматрай аьралуннаву къуллугъ бан наниминнан булайссар чара бакъа аьркинмунищалсса кьуцуртту. Му бакъассагу, дулайссар, «НиттичIан оьвча» тIисса, кьюркьусса тариф дусса телефондалул сим-картарду.
МахIачкъала шагьрулул администрациялул пресс-службалул управление

ХIадур бувссар
А. Аьбдуллаевал