[dropcap]В[/dropcap]а зуруй 100 шин хьунтIиссия 1-мур ЦIувкIратусса машгьурсса пагьламантуран, Аьрасатнал халкьуннал артистътуран, Абакаров Рабаданнун ва ХIажикьурбанов Ярагъинан. Вай кIиягу увну ур ноябрьданул 7-нний 1917-ку шинал 1-мур ЦIувкIуллал шяраву. Мюрщинийва пагьламаншивугу лархьхьуну, цикссагу билаятирттайн бивссар вай, цIувкIуллал магьирлугъ щаллагу дунияллийх машгьур дурссар.
1941-мур шинал Буттал кIанттул цIанийсса дяъви байбишиннин «Четыре Цовкра» тIисса группа хIасул бувну, пагьламан лахълай ва дунияллийцири агьали хIайран буллай буссия ХIажикьурбанов Ярагъи, Абакаров Рабадан, Кьурбанов Сабируллагь, Загьирбагов МахIаммад. 1935 шинал Киев шагьрулул циркираву зун байбивхьуссия цивппагу. «Мукьа цIувкIрачу» тIисса номер ххал хьума вайннал гьунарданий махIатталну личIайссия. Буттал кIанттул цIанийсса дяъвилий жанну харж дурссар Кьурбанов Сабируллагьлул ва Загьирбагов МахIаммадлул. ЦIанихсса ЦIувкIуллал циняв пагьламантурал аьпа баннав.
Шиккува бусанна, ЦIувкIуллал пагьламантурава 20 артистнан «Дагъусттаннал лайкь хьусса» ва «Халкьуннал артист» тIисса цIарду дуллушиву. Ца шярава 20 инсаннан ларайсса цIарду дулаву – му бюхттулсса кьимат хъанахъиссар.
На, Москавлив яхъанахъисса лаккучу Шагьаьппас Абасовлущал, лавгссияв ттула шяравучу Ярагъи ХIажикьурбановлул гьаттайн. Ярагъи увччуну ур Москавливсса «Хованский» тIисса хIатталлив. Микку жу, алхIамгу бувккуну, дуаьрдугу дурссия.
Му увччусса кIану жухь бувсуна Ярагъинал душнил ПатIимал. Ва, икьрал дурсса куццуй, Аьйшат тIимур ссищал Дагъусттаннал культуралул центрданийн бувкIуна жущал хьунабакьин.ТачIав фотоаппарат хIура къабайсса нагу вайннал сурат ларсъссия.
Вай цивппагу, Тверь шагьрулий гастроллу къуртал хьуну, ца кьинисса Москавлив шаппай буххан бувкIун бия. Хъиривмур кьини вай най бия Курск шагьрулийн, ца зуруйсса гастроллайн.
Ярагъинал бур 7 душ. Жун ччай буссия циняв душру ккаккан. ПатIимал ва Аьйшатлул бувсуна ми чув буссарив. Хъунма хъунмур душ Жарият яхъанай бур Москавлив ласнащал Шариплущал. Вай гьантрай ми санаториялийн лавгун бия, мунияту жун къаккавккуна. Хъиривмур душ Эльмира цамур хIукуматрайри тIий бия. Алмаз тIимур душгу США-наву яхъанай буссар тIива. Зулайхат Москавлив бур. ЧIанма-чIивимур Изумруд США-наву Лос-Анджелес шагьрулий гастроллай бусса бур.
Жу мадара хIарачат барду Рабаданнул душ Инна лякъин.
Му яхъанай буссар увкунни США-наву. Мунищалгу телефондалувух гъалгъа буварду.
Аьрасатнал халкьуннал артистътурал 100 шинал юбилейрдан хас дурну, ми дакIнийн бутлатисса вечер дуван дакIний буру январь зуруй, Дагъусттаннал культуралул центрданущал уртакьну. Центрданул хъунама ХIусайнов Арсен Буйдалаевичгу кумаг буллай ур.
МахIаммадхIажи
Загьидинов,
ш. Москав
